Koronavırýsqa shaldyqqandar sany áldeqaıda kóp bolýy múmkin - mınıstr

NUR-SULTAN. QazAqparat - Qazaqstanda koronavırýspen aýyrǵandar sany resmı derekten áldeqaıda kóp bolýy múmkin. Bul týraly QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

Ortalyq kommýnıkatsııalar qyzmetindegi brıfıng barysynda mınıstr adamdardyń barlyǵy birdeı PTR-testileýmen qamtylmaǵanyn atap ótti.

«Biraq, taǵy da qaıtalap aıtamyn, qazirgi ýaqytta densaýlyq saqtaý júıesiniń aldynda barlyǵyn 100 paıyz testileý mindeti turǵan joq. Óıtkeni, osy aýrýdyń alǵashqy belgileri bar tikeleı naýqastarǵa basymdyq jasalyp otyr. Sebebi, olarǵa kómek kórsetip, osy kezeńde áreket etý arqyly vırýstyń aýyr túrge ótip ketýine jol bermeý negizgi maqsatymyz», - dedi ol.

Sonymen qatar ol koronavırýs ınfektsııasy sımptomsyz ótip jatqan naýqastar jaıynda aıtty.

«Sımptomsyz naýqastardyń kópshiligi aýyrmaıdy. Iá, olar indetti taratýy múmkin. Biraq olar 14 kúnnen keıin saýyǵyp ketedi. Eshteńe mazalamaıtyn adamdardan test alýdyń qandaı máni bar? Biz negizgi basymdyq pen qarjylandyrýdy eń birinshi kezekte, kómekke muqtaj bolyp otyrǵan naýqastarǵa jumsaǵan durys dep sanaımyz», - dedi Alekseı Tsoı.