Koronavırýsqa shaldyqqan tenor Plasıdo Domıngo ózin jaqsy sezine bastady
MEHIKO. QazAqparat - Koronavırýs juqtyrǵan tenor Plasıdo Domıngo dúısenbi kúni úıde ekenin jáne ózin jaqsy sezine bastaǵanyn habarlady. Buǵan deıin BAQ-ta 79 jastaǵy opera ánshisiniń aýrýhanaǵa jetkizilgeni týraly aqparat shyqqan. Onyń qyzýy kóterilip, jótel bolǵan. 22 naýryzda koronavırýsqa alynǵan test oń bolyp shyqqan, dep habarlaıdy Associated Press-ke silteme jasaǵan QazAqparat.
Dúısenbi kúni Domıngo «eń alǵashqy belgilerge deıin men ádettegideı jasyma saı aýrýlardy esepke ala otyryp, dárigerlerdiń qadaǵalaýynda boldym» dep jazdy.
Sondaı-aq, ol barlyq adamdardy úıde otyrýǵa shaqyrdy. Koronavırýs kóp jaǵdaıda eki-úsh aptadan soń basylatyn jótel jáne qaltyraý sııaqty jeńil ári birqalypty belgiler tanytady. Al keıbir adamdarda, ásirese egde jastaǵy adamdarda vırýs pnevmonııa sııaqty aýyr syrqatqa, tipti ólimge deıin aparýy múmkin.
