Koronavırýsqa shaldyqqan naýqasqa baılanysty «Qordaı» shekara beketi ýaqytsha jabyldy

TARAZ. QazAqparat – Koronavırýs ınfektsııasyn juqtyrǵan naýqastyń anyqtalýyna baılanysty Jambyl oblysyndaǵy «Qordaı shekara beketin ýaqytsha jabýǵa týra kelgen. Bul týraly QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetinen málim etti, dep habarlaıdy QazAqparat.

Málim bolǵandaı, Qazaqstan azamaty el aýmaǵyna «Qordaı» shekara pýnkti arqyly kelgen.

«22 maýsymda Jambyl oblysyndaǵy qazaq-qyrǵyz shekarasynda ornalasqan «Qordaı» ortalyq beketinde kórshi elden kelgen COVID 19-ǵa shaldyqqan naýqas anyqtaldy.

Sanıtarııalyq-epıdemıologııalyq qyzmet mamandary bul fakti týraly Qordaı aýdandyq sanıtarııalyq-epıdemıologııalyq baqylaý basqarmasynyń basshysyna jáne Jambyl oblysy Sanıtarııalyq-epıdemıologııalyq baqylaý departamentine habarlady.

Osydan keıin shuǵyl túrde naýqasty, onymen jaqyn baılanysta bolǵan azamattardy oqshaýlaý sharalary qolǵa alyndy. Azamattar shekaradaǵy ótkizý pýnktiniń aýmaǵynda ornalasqan ızolıatorǵa jatqyzyldy. Keıin sanıtarııalyq-epıdemıologııalyq qyzmet mamandary jedel járdem brıgadasyn shaqyrdy.

Koronavırýs ınfektsııasyna shaldyqqan naýqastyń anyqtalýyna baılanysty ótkizý pýnkti basshysynyń buıryǵymen «Qordaı» beketi ýaqytsha jabyldy», - delingen taratylǵan aqparatta.

Atap ótilgendeı, dezınfektorlar beket ǵımaratyn óńdeý sharalaryn júrgizip, ǵımarat aýmaǵy jeldetilgennen keıin post óz jumysyn qaıta jalǵastyrdy.

Aıta keteıik, aǵymdaǵy jyldyń basynan beri Jambyl oblysynyń memlekettik shekarasy arqyly 185 050 adam ótse, onyń 23-inen COVID-19 anyqtaldy.