Koronavırýsqa shaldyqqan elorda turǵyny: Dárigerler aıaǵymnan tik turǵyzdy

NUR-SULTAN. QazAqparat – Elorda aýrýhanalarynda koronavırýstan emdelip jatqan naýqastar aq halatty abzal jandarǵa alǵys bildirdi, dep habarlaıdy QazAqparat.

Nur-Sultanda ınfektsııalyq aýrýhanalardyń patsıentteri dárigerlerge alǵysyn aıtty

70 jastaǵy Sáýle Kópenova osydan bir apta buryn aýyr jaǵdaıda aýrýhanaǵa túsken.

«Ótken aptanyń senbisinde aýrýhanaǵa tústim. Jaǵdaıym aýyr edi. Al qazir, mine, shyqqaly jatyrmyn. Jaǵdaıym jaqsy. Dárigerler men sanıtarlardyń bárine ana retinde zor alǵysymdy aıtqym keledi. Týǵan qyzdarymdaı kútip, emdep jatyr. Tamaǵy da jaqsy», - deıdi Sáýle Kópenova.

Erbolat Kúrebaev ta dárigerlerdiń jumysyn joǵary baǵalady. Aýrýhanaǵa alǵash túsken kezde jaǵdaıy nashar bolǵan. 10 kúndeı emdelgen.

«Dárigerler aıaǵymnan tik turǵyzdy. Medıtsına qyzmetkerlerine kópten kóp rahmet», - deıdi ol.

Elordada qazirgi ýaqytta KVI juqtyrǵandardyń jartysy emdelip shyqqan. Naqtyraq aıtqanda aýrý juqtyrǵan 6 477 adamnyń 3 675-i em-domyn alyp, úıine oraldy.

Pandemııa bastalǵaly beri jalpy elordada ınfektsııalyq tósek-oryndardyń sany 1 myńnan 4 ese kóbeıgen. Osylaısha, statsıonarlardyń sany 14-ke jetkizildi.