Koronavırýsqa shaldyqqan 229 adamnyń jaǵdaıy nashar – mınıstrlik

NUR-SULTAN. QazAqparat – Qazaqstanda koronavırýs ınfektsııasynan 14 myń adam em alýda, dep habarlaıdy QazAqparat QR Densaýlyq saqtaý mınıstrligine silteme jasap.

4 jeltoqsandaǵy málimetke sáıkes, elimizde 14 000 adam koronavırýstan em qabyldaýyn jalǵastyrýda.

«Olardyń arasynda 912 bala bar. Statsıonarlarda 3 560 naýqas jatyr. 10 440 adam ambýlatorııalyq jaǵdaıda emdelýde.

Jalpy naýqastardyń arasynda 229 adamnyń jaǵdaıy nashar. Sonyń ishinde 34 naýqastyń hali asa qatty aýyr dep baǵalanýda. 29 naýqas ókpeni jasandy jeldetý apparatyna qosylǵan», - delingen mınıstrlik aqparatynda.

Aıta keteıik, ótken bir táýlikte koronavırýs indeti 819 adamnan anyqtaldy, jazylyp shyqty – 639 naýqas. Koronavırýs belgileri bar pnevmonııa 225 adamda tirkeldi.