Koronavırýsqa PTR-anyqtamasy bolmaǵan 269 sheteldik memlekettik shekaradan ótkizilmedi

ATYRAÝ. QazAqparat – Koronavırýsqa PTR-anyqtamasyz Atyraý oblysyndaǵy memlekettik shekaradan ótpek bolǵan 269 sheteldik elge kirgizilmedi, dep habarlaıdy QazAqparat.

QR Úkimeti janyndaǵy Qazaqstanda koronavırýstyń taralýyna jol bermeý jónindegi vedomstvoaralyq komıssııanyń aqparatyna súıensek, Atyraý oblysynda «Atyraý – RF Astrahan» memlekettik shekarasyndaǵy «Qurmanǵazy» avtoótkeli arqyly azamattardyń kelýine monıtorıng kún saıyn júrgizilip keledi. Máselen, tek sońǵy táýlikte (15.02.2021 jyl) oblys aýmaǵyna memlekettik shekara arqyly 180 adam, onyń ishinde 7 jolaýshy jáne 173 halyqaralyq júk tasymaldaryn júzege asyratyn júrgizýshi ótken. Onyń ishinde 3 adamda COVID-19-ǵa anyqtama bolmaǵan. Olar karantındik statsıonarǵa ornalastyryldy.

«Shekteý sharalary engizilgen ýaqyttan bastap Atyraý oblysyna 23 082 adam, onyń ishinde 3 366 jaıaý jolaýshy, 19 716 júrgizýshi keldi. PTR-anyqtamasyz kelgen 269 shetel azamatyna el aýmaǵyna ótýine tyıym salyndy. Onymen qosa, anyqtamasyz kelgen Qazaqstannyń 2 494 azamatyna COVID-19-ǵa PTR-testileý júrgizilip, taldaý nátıjesinde koronavırýstyń shetten ákelingen 9 jaǵdaıy (6 júrgizýshi, 3 jolaýshy) anyqtaldy», - delingen aqparatta.