Koronavırýsqa qatysty taraǵan 200-ge jýyq jalǵan aqparat anyqtaldy - DSM
«Qorqynysh týdyratyn habar taratýdy toqtatyńyzdar. Olardyń bári qaýesetke toly ekenin taǵy da eskertemiz. Adamdardy shatastyrý jaqsylyqqa aparmaıdy. Sondyqtan da resmı aqparattarǵa ǵana súıenińizder. Halyqaralyq uıymdar koronavırýs týraly 200-ge jýyq jalǵan aqparatty tirkedi. Qaýesetter men jalǵan aqparattardy taldaı otyryp, olardyń shyndyqqa janaspaıtynyn aıqyn dáleldegen jýrnalıster men blogerlerge alǵysymyzdy bildiremiz», - dedi Dıas Ahmetshárip Qazmedıa ortalyǵynda ótken brıfıngte.
Onyń aıtýynsha, Densaýlyq saqtaý mınıstrligi koronavırýs jaǵdaıy týraly kún saıyn resmı aqparat taratady.
«Men búginnen bastap QR Densaýlyq saqtaý mınıstrliginiń resmı ókili bolyp taǵaıyndaldym. Biz koronavırýske baılanysty jaǵdaıdy halyqqa jedel jarııalap otyrý úshin osy kommýnıkatsııalyq alańdy qurdyq. Ár jumys kúni, saǵat 16.00-de Densaýlyq saqtaý mınıstrliginiń resmı ókili retinde sizderge kúndelikti jaǵdaıdy túsindirip otyramyn. Biz barlyq azamattar men jýrnalısterden úreı týǵyzatyn jalǵan aqparat taratýdy toqtatýdy suraımyz. Sondyqtan da Prezıdent, Úkimet jáne Densaýlyq saqtaý mınıstrliginiń saıttary sııaqty resmı derekkózderdi paıdalanýdy ótinemiz», - dedi D. Ahmetshárip.
Buǵan deıin mınıstrliktiń resmı ókili Ýhan qalasynan evakýatsııalanǵan stýdentterdiń aýrýhanadan qashan shyǵarylatynyn aıtqan edi.
Onyń aıtýynsha, 94 adam dene qyzýy men JRVI shaǵymymen oqshaýlanǵan aýrýhanaǵa jatqyzyldy .