Koronavırýsqa qatysty álemdegi jaǵdaı
Pandemııa bastalǵaly álemde koronavırýsty 80 mıllıonnan astam adam juqtyrdy. Onyń ishinde 45 mıllıony jazylyp shyqty. Qaıtys boldy – 1,75 mln naýqas. Іndetke shaldyqqandar sany boıynsha birinshi orynda AQSh (19 mıllıonǵa jýyq) tur, odan keıin Úndistan (10,1 mln), Brazılııa (7,4 mln) jáne Reseı (3 mıllıonnna astam) ornalasqan.
Eýropalyq odaqta vaktsınalaý bastaldy
Eýroodaq jeksenbi kúni azamattardy Covid-19-ǵa qarsy vaktsınalaý kampanııasyn resmı túrde bastady. EO egý naýqanyn Brıtanııa men AQSh-tan keıin birneshe aptadan soń bastady. Sebebi Pfizer-BioNTech vaktsınasy boıynsha Dárilik preparattar jónindegi eýropalyq agenttiktiń maquldaýyn kútti. Kezeń-kezeńimen 446 mln adamdy vaktsınalaý kútilýde. Degenmen, Eýropalyq komıssııa óndirýshilermen Pfizer-BioNTech-tiń 200 mln dozasyn jetkizýge ǵana kelisimshart jasasqan. Alda taǵy 100 mıllıony qosymsha satyp alynbaq. Keshe Eýropalyq komıssııanyń ókili Ýrsýla fon der Lıaıen málim etkendeı, Pfizer-BioNTech vaktsınasy Eýroodaqtyń barlyq 27 elindegi Vaktsınalaý ortalyqtaryna jetkizildi.
Jekelegen elder egý naýqanynyń resmı bastalýyn tospaı, ony senbi kúni bastap ketti. Máselen, 26 jeltoqsanda Germanııada vaktsınany alǵashqy bolyp Halbershdadt qalasyndaǵy Qarttar úıiniń turǵyndary aldy.
Italııada ekpeni birinshi bolyp Rımdegi Spallantsanı aýrýhanasynyń úsh medıtsınalyq qyzmetkeri saldyrtqan. «Vaktsınalaý jaqsy ótti. Bul, qobaljýǵa toly, tarıhı sát boldy», - dedi 28 jastaǵy medbıke BAQ-pen áńgimesi barysynda.
Vırýstyń taralýy údeı túsýde
Ótken aptada Brıtanııada tabylǵan koronavırýstyń qaýipti shtammy eýropalyq birneshe memlekette tirkelip úlgerdi, sondaı-aq Japonııa men Kanadada anyqtaldy. Ispanııa, Shvetsarııa, Shvetsııa jáne Frantsııa juqtyrý jaǵdaılaryn Brıtanııadan kelgendermen baılanystyrýda. Alaıda, Kanadanyń Ontarıo provıntsııasynda koronavırýstyń jańa túrin juqtyrǵandar brıtanııalyqtarmen qarym-qatynasta bolmaǵan.
Japonııada Londonnan oralǵan azamattyq avıatsııanyń 30 jastaǵy pıloty jáne 20-30 jastaǵy qyz shaldyqqan. El bıligi senbi kúni bir aıǵa shekarany jabatynyn málimdedi.
Ótken apta basynda Reseı eli Kanada, Túrkııa, Argentına jáne Irannan keıin Ulybrıtanııamen áýe qatynasyn toqtatty. Mundaı sharaǵa barlyǵy 35 memleket bardy. Bul sheshim Brıtanııa úkimetiniń elde koronavırýstyń anaǵurlym qaýipti shtammy anyqtalǵany jónindegi málimdemesinen keıin qabyldanǵan.
AQSh: Tramp materıaldyq kómek týraly zańǵa qol qoıǵan joq
AQSh Prezıdenti Donald Tramp senbi kúni el azamattaryna materıaldyq kómek kórsetý týraly zańǵa qol qoıýdan bas tartty. Onyń aıtýynsha, zańda kórsetilgen birjolǵy tólemniń kólemi tym az – jylyna 75 myń dollardan az tabatyn amerıkalyqtarǵa 600 dollarǵa jýyq.
Tramp bul somany kem degende 2 myń dollarǵa arttyrý kerek dep esepteıdi. Alaıda, Kongresstegi Respýblıkalyq fraktsııa músheleri tólemaqyny kóterýge kelispeýde. Pandemııaǵa baılanysty azamattarǵa kómek paketiniń bıýdjeti 1,4 trln dollardy quraıdy.
Eger de Kongress kómek týraly zańdy nemese qosalqy jań jobasyn seısenbi kúni qabyldamasa, onda AQSh úkimetine «shatdaýn» qaýpi tónedi.
