Koronavırýsqa qarsy jyl saıyn jańa vaktsına alyp otyrý kerek – maman
ALMATY. QazAqparat - Koronavırýsqa qarsy jyl saıyn jańa vaktsına alyp otyrý kerek. Bul týraly S.D. Asfendııarov atyndaǵy qazaq ulttyq medıtsınalyq ýnıversıtetiniń juqpaly jáne tropıkalyq aýrýlar kafedrasynyń professory, medıtsına ǵylymdarynyń doktory Ravılıa Egemberdıeva onlaın brıfıng barysynda aıtty, dep habarlaıdy QazAqparat tilshisi.
Onyń aıtýynsha, koronavırýs jyldam mýtatsııalanyp jatyr. Soǵan baılanysty jańa ekpeler jasalyp otyrýy kerek.
«Koronavırýspen aýyrǵan adamda 2-8 aıǵa deıin jetetin antıdene túziletini aıtylyp jatyr. Al vaktsına alǵandarda antıdene 6 aıdan 1 jylǵa deıin jetedi. Vaktsınany salǵanda adam aǵzasy ol vırýspen tanysady jáne oǵan qarsy antıdene túzip, qorǵanysh qabileti paıda bolady. Keıin vırýs juqqanda ol qorǵanysh jasýshalary birden oǵan shabýyl jasap, oǵan qarsy turady. Nemese aýyrý jeńil ótedi. Alaıda koronavırýs mýtatsııalanyp, jańa shtamdary paıda bolyp jatyr. Burynǵy antıdeneler oǵan qarsy tura almaıdy. Ol úshin jyl saıyn jańa shtamǵa qarsy turatyn vaktsına jasaý kerek», - deıdi ol.
Sonymen qatar, ol vırýsqa qarsy ımmýnıtet qansha ýaqytqa deıin saqtalatynyn dóp basyp aıtý qıyn ekenin jetkizdi.
«Ujymdyq ımmýnıtet qalyptassa, ınfektsııa ózdiginen joǵalady deý qate. Vırýs báribir aramyzda qalady. Tek jeńil ótip jáne ólimge ákelmeýi múmkin. Qazir mamandardyń eshqaısysy vırýsqa qarsy ımmýnıtet qansha ýaqytqa deıin saqtalatynyn dóp basyp aıta almaıdy. Sondyqtan qosymsha vaktsına qajet bolady», - dedi Ravılıa Egemberdıeva.
Spıkerdiń pikirinshe, vırýstardyń mýtatsııalanýy tabıǵı qubylys, jer sharyndaǵy barlyq tiri aǵzanyń jetilýinde bolatyn jaǵdaı.
«Vırýstar ózdiginen tirshilik ete almaıdy, ary qaraı ómir súrý úshin qojaıynnyń aǵzasy kerek. Sondyqtan olar árdaıym evolıýtsııalyq áserge ıe. Adamnyń ımmýndyq júıesi qozdyrǵyshtarǵa qarsy kúreste túrli ádiske barady. Qojaıyn aǵzasynyń vırýstarǵa qarsy turatyn basty ádisi antıdene túzý. Antıdene adam aǵzasyndaǵy jasýshalardy vırýstyń enip ketpeýinen qorǵaıdy. Olar qandaı da bir vırýs shtamynyń enip ketpeýine qorǵan bolady», - deıdi professor.
