Koronavırýsqa qarsy jańa preparat emdeý hattamasyna engizilýi múmkin

NUR-SULTAN. QazAqparat – Elimizdiń densaýlyq saqtaý mınıstrligi koronavırýsqa qarsy jańa preparatty klınıkalyq hattamaǵa engizýdi qarastyryp jatyr. Bul týraly QR Densaýlyq saqtaý mınıstrligi dári-dármek saıasaty departamentiniń basshysy Baýyrjan Júsipov málim etti, dep habarlaıdy QazAqparat tilshisi.

«Álemde KVI-di emdeý úshin qoldanylatyn birqatar dári-dármek bar. Biraq ol preparattar zertteýdiń sońǵy kezeńinen ótken joq. Degenmen, birqatar elder keıbir dári-dármekterdi shuǵyl jaǵdaıda qoldanýǵa usynys berip otyr. Qazir bul baǵytta bizdiń klınıkalyq hattamany ázirleýshi mamandar belsendi jumys istep jatyr. Jaqyn arada jumys nátıjesin jarııalaımyz. Bir aı ishinde belgili bolyp qalady», - dedi Baýyrjan Júsipov OKQ-de ótken brıfıngide.

Aıta ketsek, qazir ortalyq kommýnıkatsııalar qyzmeti alańynda elimizdegi epıdemıologııalyq jaǵdaıǵa qatysty baspasóz máslıhaty ótip jatyr.

Brıfıngide belgili bolǵandaı shilde aıy bastalǵaly 3 qazaqstandyq koronavırýstan qaıtys boldy.

Sonymen qatar, qazir álemde omıkron shtamynyń órship turǵany aıtyldy.

Sondaı-aq, elimiz 300 myń doza Pfizer vaktsınasyn satyp alý boıynsha kelisim júrgizip jatyr.