Koronavırýsqa qarsy zararsyzdandyrý ne sebepti júrgizilmeıdi

NUR-SULTAN. QazAqparat – QR Densaýlyq saqtaý birinshi vıtse-mınıstri Marat Shoranov adamdar kóp jınalatyn jerlerde koronavırýsqa qarsy zararsyzdandyrý nelikten júrgizilmeıtinin túsindirdi, dep habarlaıdy QazAqparat tilshisi.

«Byltyr koronavırýs pandemııasy paıda bolǵanda vırýstyń taralý joldary naqty zerttelmegen edi. Sondyqtan Dúnıejúzilik densaýlyq saqtaý uıymynyń usynysyna oraı zararsyzdandyrý jumystary jıi júrgizildi. Ol tek Qazaqstanda emes, álem elderinde oryn aldy. 2020 jyly mınıstrlik koronavırýstyń belgisiz vırýs bolýyna baılanysty adamdar kóp jınalatyn oryndardy, aıaldamalardy, qoǵamdyq kólikterdi zararsyzdandyrý, zararsyzdandyrý týnnelderin ornatý sheshimin qabyldady», - dedi birinshi vıtse-mınıstr Ortalyq kommýnıkatsııalar qyzmetinde ótken baspasóz máslıhaty barysynda.

Onyń atap ótýinshe, búginde júrgizilgen zertteý nátıjeleri mundaı is-sharalardyń tıimdiligi tómen ekendigin kórsetken.

«Osyǵan oraı mınıstrlik ǵımarattardy, kóshelerdi, qoǵamdyq oryndardy zararsyzdandyrýdan bas tartý týraly sheshim qabyldady. Bul Dúnıejúzilik densaýlyq saqtaý uıymynyń usynysyna saı keledi», - dedi Marat Shoranov.