Koronavırýsqa qarsy vaktsınany bári alý kerek- Záýresh Amanjolova
ALMATY. QazAqparat – Qazaqstannyń memleket jáne qoǵam qaıratkeri, medıtsına ǵylymdarynyń doktory Záýresh Amanjolova jappaı vaktsınalaýdyń róli týraly aıtty, dep habarlaıdy QazAqparat tilshisi.
Onyń aıtýynsha, Almatyda jappaı vaktsınatsııa jumysy joǵary deńgeıde uıymdastyrylǵan.
«Almaty qalasynda vaktsına alýdyń barlyq múmkindigi qarastyrylǵan. Men soǵan qýanyshtymyn. Búgingi kúni turǵyndar qaýipti indetke qarsy vaktsınatsııanyń ne úshin qajet ekenin sanaly túrde túsinýi kerek. Koronavırýstyń óte jaman ınfektsııa ekeni dáleldendi. Al vaktsınatsııa - oǵan qarsy turýdyń jalǵyz joly. Byltyr pandemııa sharyqtap turǵan kezde men ortalyq qalalyq klınıkalyq aýrýhanada boldym jáne ókpeniń 90-100% zaqymdanǵan patsıentter saýyǵyp shyǵyp jatqanyn kórdim. Men kóptegen jaǵdaılarǵa kýá boldym. Al, ókpesi 40% -y qabynǵan keıbir naýqastar qaıtys boldy. Nege? Óıtkeni, ár organızmniń jáne ımmýndyq júıeniń óz ereksheligi bar «, - dedi Záýresh Amanjolova.
Spıkerdiń aıtýynsha, koronavırýs ınfektsııasyn juqtyrmas úshin bárine vaktsına alý kerek.
«2020 jyly Memleket basshysy «Halyq densaýlyǵy jáne densaýlyq saqtaý júıesi týraly» Qazaqstan Respýblıkasynyń kodeksine qol qoıdy. Onda balalarǵa qajet vaktsınalardy alý mindetteldi. Bul týraly kóptegen pikirtalastar boldy. Koronavırýsqa qarsy vaktsına, árıne, mindetti emes, biraq ony saldyrý kerek. Búgin biz turǵyndardy osyǵan shaqyramyz. Vaktsına jasaýda bizdiń qazaqstandyq bıomedıtsına jáne bıohımııa ǵalymdarynyń qosqan úlesin atap ótkim keledi. Bul qazaqstandyq medıtsına ǵylymy úshin úlken jetistik dep sanaımyn jáne biz muny maqtan tutamyz «, - dedi spıker.
