Koronavırýsqa qarsy vaktsına júktilikke áser ete me

ALMATY. QazAqparat - Almaty qalalyq Perınataldyq ortalyǵynyń gınekology Ásel Omarqulova onlaın brıfıngte vaktsınanyń birinshi komponentin alǵan jáne júktilik týraly keıin bilgen áıelderdi esh alańdamaýǵa shaqyrdy, dep habarlaıdy QazAqparat tilshisi.

«Eger áıel vaktsınanyń birinshi dozasyn alyp, júkti ekenin bilse, munda qorqatyn eshteńe joq. Ol ekinshi dozany alý úshin medıtsınalyq kómekke júginedi. Júkti áıelderdi vaktsınalaý máselesi búginde álemde talqylanyp, qarastyrylyp jatyr. Júktiliktiń alǵashqy úsh aıynda egjeı-tegjeıli skrınıngtik zertteýden, ÝDZ-di 11-13 apta aralyǵynda ótý kerek», - dedi Ásel Omarqulova.
Ol medıtsınada ana men uryqtyń ómirin saqtap qalý úshin júktilik kezinde vaktsına alýdyń kóptegen mysaly bar ekenin tilge tıek etti. Sebebi júkti áıelderde de koronavırýs ınfektsııasyn juqtyrý qaýpi bar.
«Dúnıejúzilik densaýlyq saqtaý uıymy júkti áıelderge koronavırýsqa qarsy vaktsına alýdy usynady. Vaktsına uryqqa ene almaıdy jáne oǵan vırýs juqpaıdy, ana súti de vırýstan taza bolady», - dedi dáriger.
Onyń aıtýynsha, jaqyn arada júktilikti josparlap otyrǵan áıelderge KVI-ge qarsy vaktsına alý qajet. Sonymen qatar, júktilikti vaktsınanyń ekinshi komponentin alǵannan keıin bir aıdan keıin josparlaǵan jón.
«Vaktsınatsııa júktilikke nemese reprodýktıvti júıege eshqandaı áser etpeıdi. Bizdiń elde júkti jáne bala emizetin áıelderge ekpe salý týraly áli aıtylǵan joq. Dárigerler preparatty ázirleýshiler júrgizgen klınıkalyq zertteýlerdiń resmı nátıjelerin kútýde. Usynymdar túse salysymen eshkim vaktsınany dereý qoldanbaıdy. Bári qaýipsiz jaǵdaıda ári óz retimen jasalatyn bolady», - deıdi spıker.