Koronavırýsqa qarsy vaktsına saldyrǵan aqtóbelik kólik utyp aldy
Aqtóbelikter «Ekpe al da, avtomobıl utyp al» aktsııasyna belsendi qatysty. Demeýshilerdiń qoldaýymen eki jeńil kólik, velosıped, robot shańsorǵysh, smart saǵat, uıaly telefon utysqa tigildi.
«Aqpan aıynda vaktsınalaý jumysy bastalyp, adamdardyń bir bóligi onyń mańyzyn túsindi. Birden ımmýndaý sharasyna qatysyp, belsendilik tanytty. Al jazǵa taman adam sany azaıa bastady. Biz belsendilikti arttyrý maqsatynda utys ótkizdik. Alǵashqy kólikti 1-tamyzda tabystasaq, ekinshisi de ıesin tapty. Sonymen birge uıaly telefon, velosıped, shańsorǵysh, smart saǵat bar. Qazir de vaktsınatsııa jumysy jalǵasyp jatyr», - dedi oblystyq densaýlyq saqtaý basqarmasynyń basshysy Rústem Isaev.
Aıta keteıik, óńirde 522 myń adam vaktsınatsııalaýǵa jatady. Onyń 64% ımmýndaý sharasyna qatysty.
«Oıyl aýdany, Saraljyń aýylynda týyp-óstim. Qazir Aqtóbe qalasynda turamyn. Eki qyzym bar. Ata-anammen birge turamyz. Vaktsınany 20-tamyz kúni №7 qalalyq emhanada saldyrdym. Ózim jeke sharýashylyqta jumys isteımin. Densaýlyǵyma alańdap, vaktsına saldyrdym. Esh keri áserin sezbedim. Al utysqa keler bolsaq, umytyp kettim. Jumysta otyrǵan kezde kelinshegim júgirip kelip, «mashına uttyq» dep aıtty. Aıaq-qolym dirildep ketti. Tamaq ta batpaı qaldy. Senbedim. Ómirimde mundaı utys bolmady», - dedi utys ıesi Ernur Іzǵalıev.
