Koronavırýsqa qarsy vaktsına munaı naryǵyn jandandyrady - Nurlan Noǵaev

NUR-SULTAN. QazAqparat – Koronavırýsqa qarsy vaktsınanyń ázirlenýi munaı-gaz naryǵyn jandandyrýǵa múmkindik beredi. Bul týraly QR Energetıka mınıstri Nurlan Noǵaev málim etti, dep habarlaıdy QazAqparat tilshisi.

«Munaı-gaz salasy túrli ózgeristerge óte sezimtal ekeni belgili. Munaı men gaz – bırjalyq taýarlar. Sondyqtan álemde bolyp jatqan ózgerister baǵaǵa yqpal etip otyr. Jalpy damýǵa, ekonomıkaǵa áser etetin kez kelgen oqıǵa men saıası faktorlar munaı baǵasyna áserin tıgizedi», - dedi mınıstr Ortalyq kommýnıkatsııalar qyzmetinde.

Osy oraıda ol iri memleketter basshylarynyń málimdemeleri nemese qandaı da bir eleýli sheshimder baǵanyń qalyptasýyna ózgeris engizetinin atap ótti.

«Bıyl Qazaqstan 5 mln tonnaǵa óndirý kólemin tómendetti. Bul qadam qoımalarda ónimniń shekten tys jınalmaýy úshin ári ken oryndarynyń toqtaýyna jol bermeý baǵytynda iske asyryldy. Atap aıtqanda, osynyń barlyǵy OPEK+ kelisim aıasynda qajetti shara boldy. Saladaǵy sarapshylar koronavırýsqa qarsy vaktsınany daıarlaý jaqsy nátıje berip, ekonomıkalyq damý jandanatynyn aıtýda», - dedi N. Noǵaev.