Koronavırýsqa qarsy vaktsına májbúrli túrde egilmeıdi - Tımýr Muratov
NUR-SULTAN. QazAqparat – Maman «koronavırýsqa qarsy ekpeni májbúrli túrde salady» degen qaýesetke qatysty jaýap berdi, dep habarlaıdy QazAqparat tilshisi.
Ortalyq kommýnıkatsııalar qyzmetindegi baspasóz máslıhatynda vaktsına saldyrý erikti tártipti júrgizilse de, keıbir adamdar «koronavırýsqa qarsy ekpe májbúrli túrde salynady» dep alańdaýly ekeni aıtyldy. Osy oraıda turǵyndardyń mundaı jaǵdaıǵa tap bolýy múmkindigi suraldy.
«Budan buryn habarlanǵandaı, vaktsınalaý erikti túrde bolady. Osy oraıda májbúrleý degen bolmaıdy jáne vaktsına almaǵan azamattarǵa qarsy eshqandaı sanktsııa qarastyrylmaǵan. Buǵan jol berilmeıdi. Birinshi kezekte vaktsına adamnyń ózin qorǵaý úshin qoıylady. Sondyqtan ol ár adamnyń jeke sheshimi. Jeke óz basym ınfektsııadan qorǵalǵym keledi», - dedi Nur-Sultan qalasynyń qoǵamdyq densaýlyq saqtaý basqarmasynyń basshysy Tımýr Muratov.
Buǵan deıin ol vaktsına alǵanyn aıtqan bolatyn. Osy oraıda koronavırýstyń saldaryn árbir adam ózi baǵalaýy kerektigin atap ótti.
Óz kezeginde QR DSM «Qoǵamdyq densaýlyq saqtaý ulttyq ortalyǵy» ShJQ RMK «Sanıtarııalyq-epıdemıologııalyq saraptama jáne monıtorıng ǵylymı-praktıkalyq ortalyǵy» fılıaly dırektorynyń orynbarasy Manar Smaǵul vaktsınalaýdyń maqsaty týraly aıtty.
«Vaktsınalanǵan adamdar kóp bolǵan saıyn, qozdyrǵyshtardyń taralýy keńistigi tarylady. Vaktsınadan bas tartýdan buryn oılaný kerek, ıaǵnı ol jeke ózine ǵana emes, sonymen qatar jaqyn adamdary aldynda jaýapkershiligi bar ekenin sezingeni jón. Óıtkeni vaktsına saldyra almaıtyn adamdar bar. Ekpe saldyrǵandar kóbeıgende, vırýstyń taralýy da shekteledi. Vaktsınalaý saıasaty osyǵan negizdelgen. Koronavırýsqa qarsy vaktsınalaý týraly aıtqan kezde, bizdiń maqsat – ujymdyq ımmýnıtetti qurý», - dedi Manar Smaǵul.
