Koronavırýsqa qarsy vaktsına adamdy qansha ýaqytqa deıin qorǵaı alady
ALMATY. QazAqparat - QR klınıkalyq jáne irgeli medıtsına akademıgi, Asfendııarov atyndaǵy QazUMÝ epıdemıologııa kafedrasynyń professory Sáken Ámireev onlaın brıfıng barysynda koronavırýske qarsy vaktsınanyń qorǵanysh kúshi qansha ýaqytqa jetetinin aıtty, dep habarlaıdy QazAqparat tilshisi.
Spıkerdiń aıtýynsha, koronavırýsqa qarsy vaktsınanyń paıda bolǵanyna kóp ýaqyt bolǵan joq, sondyqtan onyń qorǵanysh kúshi qansha ýaqytqa jetetinin eshkim naqty aıta almaıdy. Eń bastysy vaktsınanyń qorǵanysh kúshi bar.
«Qazir bizde salynyp jatqan ekpelerdiń qorǵanysh kúshi bar, ol tolyq anyqtalǵan. Alaıda ekpe salǵan soń túziletin antıdene qansha ýaqytqa jetetini belgisiz. Qorǵanys ımmýnıteti bir nemese eki jylǵa jetedi dep eshkim naqty aıta almaıdy. Vaktsına óndirýshilerdiń ózi shamalap qana aıtady. «Spýtnık V» vaktsınasy 2021 jyldyń basynda ǵana shyqty. Sondyqtan qazir vaktsına qansha ýaqytqa deıin qorǵaıtynyn eshkim aıta almaıdy. Ol ýaqyt óte kele belgili bolady. Bastysy onyń qorǵanysh kúshi bar»,- dedi Sáken Ámireev.
Sonymen qatar, ol koronavırýstan qorǵanýdyń jalǵyz joly ekpe ekenin aıtty.
«Qazir kúnde osy vırýstan kóz jumyp jatqandar bar. Bul indettiń aldyn alý úshin vaktsına salǵan durys. Ǵalymdar aldaǵy ýaqytta bir ret salǵan soń ómir boıyna saqtaıtyn vaktsına jasap shyǵarady degen oıdamyn, bul ázirge tek arman bolyp otyr»,-dedi professor.
