Koronavırýsqa qarsy vaktsına 1,5 jyldan keıin daıyn bolýy múmkin

BEIJІŃ. QazAqparat – Koronavırýsqa qarsy alǵashqy vaktsınalar 18 aıdan keıin daıyn bolýy múmkin, dep málim etti Dúnıejúzilik densaýlyq saqtaý uıymynyń (DDU) basshysy Tedros Adanom Gebreıesýs. Bul týraly QazAqparat uıymyń baspasóz qyzmetine silteme jasap habarlaıdy.

«Alǵashqy vaktsına 18 aıdan keıin daıyn bolýy múmkin. Sondyqtan biz osy vırýspen kúresý úshin búgingi kúni qolda bar «qarýdy» paıdalana otyryp, bárin jasaýymyz kerek», - dep keltirilgen onyń sózi uıym saıtynda.

DDU basshysy vaktsınalar men terapııalyq quraldardy ázirleý mańyzdy ekenin atap ótti. Alaıda, bul zertteý baǵdarlamasynyń bir bóligin ǵana quraıdy.

«Olardy ázirleýge ýaqyt qajet bolady. Biraq, onymen bir mezgilde, biz qorǵansyz emespiz», - dep atap ótti Tedros Adanom Gebreıesýs.

«Qoǵamdyq densaýlyq saqtaýdyń ınfektsııalarmen kúrese alatyn kóptegen negizgi sharalary bar», - dep habarlady ol.

Dúnıejúzilik densaýlyq saqtaý uıymy koronavırýstyń jańa túrine COVID-19 ataýyn berdi. Sonymen qatar, DDU basshysy álem elderin jańa koronavırýspen kúresti jandandyrýǵa shaqyrdy. Sondaı-aq ol halyqaralyq qaýymdastyqta indettiń aldyn alý úshin «múmkindikter terezesi» bar ekenin atap ótti.

«Bul vırýs – qoǵamnyń nómiri birinshi jaýy», - dep túıindedi Gebreısýs.

Ótken táýlikte (11 aqpan kúni saǵat 24:00-degi jaǵdaı boıynsha) materıktik Qytaıda koronavırýsty juqtyrýdyń 2015 jańa jaǵdaılary (Hýbeı provıntsııasynda - 1638), 97-si (94-i - Hýbeıde) mert bolǵan. Sońǵy málimetter boıynsha, QHR -da koronavırýs aýrýynyń rastalǵan jaǵdaılarynyń jalpy sany – 44653, qaza tapqandar – 1113.