Koronavırýsqa qarsy sýbýnıttik vaktsına memlekettik saraptamadan ótti

NUR-SULTAN. QazAqparat – Bıologııalyq qaýipsizdik problemalary ǵylymı-zertteý ınstıtýtynyń ǵalymdary koronavırýsqa qarsy vaktsınanyń bes túrin ázirlep jatyr. Instıtýttyń bas dırektory Kúnsulý Zakarııa QazVac-tan ózge tórt vaktsınanyń qazir qandaı satyǵa shyqqanyn aıtty, dep habarlaıdy QazAqparat tilshisi.

«Ǵalymdar bir ýaqytta bes túrli platformada bes túrli vaktsına ázirlep jatyr. QazCOVID-in nemese QazVac týraly bárin bilesizder dep oılaımyn. Ekinshisi – sýbýnıttik vaktsına. Búgingi tańda ol bıologııalyq qaýipsizdik máseleleri ınstıtýtynyń bazasynda janýarlarǵa egilip, klınıkaǵa deıingi kezeńnen tolyq ótti. Dárilik zattardy saraptaý ulttyq ortalyǵynda memlekettik saraptamadan da sátti ótti. Olar da oń qorytyndysyn berdi. Endi atalǵan sýbbirlikti vaktsına klınıkalyq zertteýdiń birinshi kezeńine shyǵady», - dedi Kúnsulý Zakarııa.

Instıtýttyń bas dırektory ózge vaktsınalar týraly da aıtty.

«Bizde bir mezgilde eki vektorlyq vaktsına ázirlenýde. Bireýi tumaý vektory negizinde, ekinshisi vırýstyń kaprıpoks vektorynda jasaldy. Qazir bul eki vaktsına janýarlarǵa egilip, klınıkaǵa deıingi synaqtardan ótip jatyr. Vaktsınanyń besinshi túri – «tiri» vaktsına. Biz álemde birinshi bolyp álsiretilgen vaktsınany alýǵa tyrysamyz. Júzden astam synamanyń ishinen iriktep aldyq. Jýyq arada ony da janýarlarǵa egip, klınıkaǵa deıingi zertteýge shyǵaramyz», - dedi Kúnsulý Zakarııa.

Ǵalymnyń aıtýynsha, ázirlenip jatqan tórt vaktsınany saqtaý tehnologııasy QazCOVID-in (QazVac) vaktsınasynan ózgeshe bolady.

Eske salsaq, QazVac 2-den 8 gradýsqa deıingi temperatýrada saqtalýy kerek.