Koronavırýsqa qarsy shekteý sharalary qandaı jaǵdaıda qatańdatylady - DSM

NUR-SULTAN. QazAqparat – QR Densaýlyq saqtaý mınıstri Ajar Ǵınııat koronavırýsqa qarsy shekteý sharalary qandaı jaǵdaıda qatańdatylatynyn atady, dep habarlaıdy QazAqparat tilshisi.

«Qatań shekteý sharalaryn qandaıda bir óńir nemese respýblıka «qyzyl» aımaqta bolǵan jaǵdaıda engizemiz. «Qyzyl» aımaqtyń ózin biz eki kezeńge bóldik. Birinshi kezeńde maska taǵýdy mindetteımiz. Qazir respýblıka negizinen «jasyl» aımaqta turǵandyqtan, maska taǵýdy usynyp qana otyrmyz. Pandemııa eki jyldan astam ýaqyttan beri jalǵasyp keledi. Halyq jaqsy biledi. Qazir biz adam kóp shoǵyrlanatyn oryndardyń bárinde óz densaýlyǵyńyz úshin maska taǵýdy usynyp otyrmyz. Siz turatyn óńirde naýqastar kóbeıgen bolsa, maska taǵyńyz», - dedi Ajar Ǵınııat ortalyq kommýnıkatsııalar qyzmetinde ótken brıfıngide.

Sondaı-aq, ol ázirge vırýstyń taralýy baıqalsa da, bızneske shekteý qoıylmaı otyrǵanyn eske saldy.

«Baıqasańyzdar, biz bızneske eshqandaı shekteý sharalaryn qabyldap jatqan joqpyz. Densaýlyq saqtaý mınıstrligi aldyn alý sharalaryn saqtaýǵa keńes beredi. Bul ózińizdi de, halyqty da aýrý juqtyrýdan saqtaıdy. Qazir aýrý birshama jeńil ótip jatqany belgili. Naýqastardyń 94%-y ambýlatorııalyq em qabyldap jatyr. Biz tek usynym ǵana berip otyrmyz. Biraq, halyqtyń densaýlyǵyna qater tónse nemese aýyr jaǵdaılar kóbeıip, ólim-jitim jıilep ketse, qabyldaıtyn sharalardy qaıta qaraımyz», - dedi vedomstvo basshysy.

Mınıstr buǵan deıin Qazaqstanda maımyl sheshegin dıagnostıkalaýdyń ádistemesi ázirlenip jatqanyn aıtty.