Koronavırýsqa qarsy reseılik vaktsınanyń bir dozasy qansha turady
MÁSKEÝ. TASS-QazAqparat – Koronavırýsqa qarsy reseılik vaktsınanyń baǵasy bir doza úshin 1 myń rýblden aspaıdy. Al aldaǵy ýaqytta baǵasy arzandaı túsedi.
Bul týraly jýrnalısterge Federaldyq monopolııaǵa qarsy qyzmettiń (FMQQ) basshysy Igor Artemev málim etti, dep habarlaıdy QazAqparat TASS agenttigine silteme jasap.
«Biz tarıf óte joǵary bolýy múmkin ekenin túsinemiz, aıtalyq, bir dozasy myń rýblge deıin. Óıtkeni vaktsınalar salystyrmaly túrde az mólsherde shyǵarylady jáne óndiristi keńeıtý úshin olarǵa kapıtal qajet. Sondyqtan, biz bul tarıfti, ózindik qunyn anyqtaý úshin baǵany, belgilegen kezde belgili bir formýla bolady dep kelistik, óıtkeni qazir basqa eldermen salystyrýǵa múmkindik beretin baza joq», - dedi Artemev.
FMQQ basshysy tarıftiń áli belgilenbegenin, biraq onyń baǵasy myń rýblden az bolatynyn atap ótti.
«Budan ári referenttik elderge arnalǵan ındıkatorlar paıda bolǵan kezde baǵa tek tómendeıtin bolady», - dep atap ótti ol.
Eske sala keteıik, «Vektor» ortalyǵy 24 shildede Reseı Federatsııasynyń Densaýlyq saqtaý mınıstrliginen vaktsınany eriktilerge klınıkalyq synaqtan ótkizýge ruqsat aldy. Alǵashqy eriktige 27 shildede ekpe salyndy. Klınıkalyq zertteýlerge qatysqan 20 eriktiden turatyn top 8 qyrkúıekte aýrýhanadan shyǵaryldy.
Rospotrebnadzor basshysy Anna Popova vaktsınanyń klınıkalyq synaqtan ótýi 30 qyrkúıekte aıaqtalǵanyn habarlady. Vaktsınany tirkeýdi 15 qazanǵa deıin aıaqtaý josparlanýda.
