Koronavırýsqa qarsy preparattardyń baǵasy arzandady
NUR-SULTAN. QazAqparat – Koronavırýsqa qarsy preparattardyń baǵasy arzandady, dep habarlaıdy QazAqparat Dárilik zattar men medıtsınalyq buıymdardy saraptaý ulttyq ortalyǵynyń málimetterine silteme jasap.
Dárilik zattar men medıtsınalyq buıymdardy saraptaý ulttyq ortalyǵy men Básekelestikti qorǵaý jáne damytý agenttiginiń birlesken jumysynyń qorytyndysy boıynsha koronavırýs ınfektsııasyna qarsy preparattar úshin shekti baǵalardy qalyptastyrýdyń erekshe tártibi kózdelgen.
Shekteý is-sharalary, onyń ishinde karantın kezinde qoldanylatyn shekti baǵalardy qalyptastyrýdyń erekshe tártibi boıynsha kóterme jáne bólshek saýdada marketıngtik shyǵystarsyz, ústeme baǵalardyń regressıvti shkalasyna sáıkes dárilerdiń tizimi Dárilik zattar men medıtsınalyq buıymdardy saraptaý ulttyq ortalyǵyna jiberiledi.
Bul tizimdegi dárilik preparattarǵa suranys kóp bolǵandyqtan, kóterme jáne bólshek saýdada 30 paıyz mólsherindegi marketıngtik shyǵystar alyp tastalǵan. Sondaı – aq, kóterme jáne bólshek ústeme baǵa eki ese tómendedi. Eger buryn kóterme ústeme baǵa 20 paıyzǵa jetken bolsa, onda antıkovıdti preparattar úshin tıisinshe 10, eger bólshek ústeme baǵa 55 paıyzǵa deıin jetken bolsa, antıkovıdti preparattar úshin 27 paıyzǵa tómendegen. Mysaly, Kardıomagnıl 75 mg №30, 75 mg №100, 150 mg №30 preparaty úshin bólshek ústeme baǵa 22,5 paıyzdy, al Kardıomagnıl 75 mg №100 preparaty 17,5% paıyzdy quraıdy. Osylaısha, barlyq antıkovıdti preparattarǵa arnaıy tártip qoldanylady.
Básekelestikti qorǵaý jáne damytý agenttiginiń derekteri boıynsha, antıkovıdti preparattardyń baǵasy naryqtyq baǵamen salystyrǵanda 27% paıyzǵa tómendegen. Bul sharalar qazaqstandyqtardyń antıkovıdti preparattarǵa shyǵynyn azaıtý men alypsatarlyq áreketterdiń aldyn alýǵa baǵyttalǵan.
Qazaqstan aýmaǵynda dárilik zattardyń baǵalaryn retteý jónindegi ókilettikter QR Densaýlyq saqtaý mınıstrligine júktelgen. Al dárilik zattardy belgilengen shekti baǵadan qymbat satý áreketi úshin Qazaqstan Respýblıkasynyń Ákimshilik quqyq buzýshylyq týraly Kodeksiniń 426-baby boıynsha ákimshilik jaýapkershilik qarastyrylǵan.
Sonymen qatar, qazaqstandyqtar Dari.kz mobıldik qosymshasynyń kómegimen dárihanalardaǵy qandaı da bir preparattyń baǵasyn óz betinshe baqylaı alady. Eger de dári-dármektiń baǵasy bekitilgen baǵadan joǵary bolsa, onda arnaıy formany toltyryp, shaǵym qaldyrýǵa múmkindik bar.
Osy rette dárilik zattardyń emdik qasıetteri orıgınal preparatpen birdeı bolyp keletin analogtary bolatynyn eskergen jón. Mysaly, kardıomagnıl preparatynyń (belsendi zaty atsetılsalıtsıl qyshqyly) 23 analogy, ıbýprofenniń (belsendi zaty bar ıbýprofen) 56 analogy, sýmamedtiń (belsendi zaty azıtromıtsın) 50 analogy, ksareltonyń (belsendi zaty rıvaroksaban) 4 analogy, kleksannyń (belsendi zaty natrıı enoksaparın) 2 analogy bar.
