Koronavırýsqa qarsy kúres jumystaryna qosymsha 238,7 mlrd teńge bólindi

NUR-SULTAN. QazAqparat – Qarjy mınıstri Erulan Jamaýbaev Úkimetke 2020 jylǵa arnalǵan respýblıkalyq bıýdjetti naqtylaý týraly zań jobasyn tanystyrdy, dep habarlaıdy QazAqparat tilshisi.

«Ózderińizge belgili, alǵashqy naqtylaý koronavırýs ınfektsııasymen kúresýge jáne ekonomıkalyq belsendiliktiń baıaýlaýy jaǵdaıynda ekonomıka men bıznesti qoldaýǵa baǵyttalǵan edi. Jalpy daǵdarysqa qarsy sharalardy jáne Prezıdenttiń jekelegen tapsyrmalaryn qarjylandyrý úshin sol kezde bıýdjet shyǵystary 1,4 trln teńgege ulǵaıtyldy. Ekinshi naqtylaýdyń mindeti COVID-19 vırýsyna qarsy kúres jónindegi is-sharalardyń iske asyrylýyn jalǵastyrý jáne ekonomıkanyń naqty sektoryn qoldaý bolyp sanalady», - dedi Erulan Jamaýbaev Úkimet otyrysynda.

Mınıstr bıýdjettiń ekinshi naqtylaýynyń parametrlerine tolyǵyraq toqtalyp ótti.

«Respýblıkalyq bıýdjet túsimderi 185 mlrd teńgege ulǵaıyp, 12 trln teńge kóleminde anyqtaldy. Tapshylyq jalpy ishki ónimge 3,5% deńgeıinde saqtaldy. Respýblıkalyq bıýdjettiń shyǵystary 205 mlrd teńgege ósip, 14,5 trln teńgeni quraıtyn bolady. Qosymsha sharalardy iske asyrý úshin bıýdjet shyǵystary jalpy somasy 296 mlrd teńgege ońtaılandyryldy», - dedi ol.

Erulan Jamaýbaev bıýdjet shyǵystaryn ózgertý negizinen Prezıdent Joldaýyndaǵy máseleler men basqa da tapsyrmalaryn oryndaýmen baılanysty birqatar baǵytty qamtıtynyn jetkizdi. Atap aıtqanda koronavırýs ınfektsııasymen kúres boıynsha

jumystarǵa qosymsha 238,7 mlrd teńge bólindi.