Koronavırýsqa qarsy kúres: Jarkenttegi aýrýhanaǵa ottegi stansasy ornatylady
Panfılov aýdany ákiminiń baspasóz qyzmetiniń málimetinshe, jalpy quny 76 mln teńgeni quraıtyn joba qazan aıynda iske qosylmaq. Qazir stantsııany ornatý jumystary bastaldy. 320 orynǵa arnalǵan ortalyq aýrýhana janynan ashylatyn ottegi stantsııasynan bir mezette 50 núkteden ottegi toltyrylady.
Ortalyq aýrýhananyń bas dárigeri Tóleý Sarpekovtyń aıtýynsha stantsııa saǵatyna 50 metr kýbqa deıin ottegi quıady. Sondaı-aq, 120 naýqasqa bir ýaqytta qajetti ottegi beriledi.
«Almatydan aýyr ballondardy tasıtynbyz. Endi mine, bul másele de sheshildi. Budan bólek osy pandemııa kezinde bizdiń ortalyq aýrýhanaǵa kásipkerler men qaıyrymdy azamattar onnan astam ottegi kontsentratyn, basqa da qajetti medıtsınalyq jabdyqtardy tartý etti. Memleket tarapynan da qajetti kómek kórsetilýde. Biz indettiń yqtımal ekinshi tolqyna tolyqtaı daıyn», —deıdi bas dáriger.
Pandemııa bastalǵaly beri Panfılov aýdanynda 139 adam indetke shaldyqqan. Qazir atalǵan adamdar tolyqtaı jazylyp, óńirde sanıtarlyq saqtandyrý jumystary júrgizilýde.