Koronavırýsqa qarsy qazaqstandyq vaktsına barlyq talaptarǵa saı – ǵylym doktory
NUR-SULTAN. QazAqparat – Koronavırýs indeti etek jaıǵaly álem elderi jedel vırýsqa qarsy vaktsına ázirleýge kirisip ketti. Búgingi kúni birneshe el ǵalymdar.y vaktsına ázirlep, ony synaqtan ótkizýde. Onyń ishinde bizdiń otandyq ǵalymdar da bar, dep habarlaıdy QazAqparat.
Qazaqstandyq ǵalymdar atalǵan vırýsqa qarsy vaktsına ázirleýge naýryz aıynyń sońynda kirisken bolatyn. Osy oraıda otandyq ǵalymdardyń vaktsına ázirleýdegi jetistigi týraly tilshimizge QR Bilim jáne ǵylym mınıstrligi Ǵylym komıtetine qarasty Bıologııalyq qaýipsizdik problemalary ǵylymı-zertteý ınstıtýty bas dırektorynyń ǵylym jáne kommertsııalandyrý jónindegi orynbasary, veterınarııa ǵylymynyń doktory Erǵalı Ábdiraıymov áńgimelep berdi.
«Koronavırýs indetine qarsy vaktsına ázirleýdi bizdiń ınstıtýttyń ǵalymdary naýryz aıynyń sońynda qolǵa aldy. 9 mamyrda alǵashqy vaktsına daıyn boldy. Sondaı-aq, ol Dúnıejúzilik densaýlyq saqtaý uıymynda alǵashqy qazaqstandyq kandıdatty vaktsına retinde tirkelip, klınıkaǵa deıingi synaq júrgizildi. Shilde aıynyń sońynda alynǵan nátıjeler boıynsha otandyq vaktsına zııansyzdyǵy, pırogendigi, ımmýnogendigi jáne taǵy basqa parametrleri boıynsha halyqaralyq jáne Qazaqstandyq farmakopeıa talaptaryna tolyq saı keletini dáleldendi», - dedi E. Ábdiraıymov.
Onyń aıtýynsha, atalǵan vaktsına klınıkalyq synaqtan ótken soń Densaýlyq saqtaý mınıstrligine tirkeýge jiberiledi.
«Sonymen qatar bizdiń ǵalymdar 30-31 shilde kúnderi ekinshi sýbbirlikti vaktsına ázirledi, ol Dúnıejúzilik densaýlyq saqtaý uıymynda tirkeldi. Bul bizdiń ǵalymdardyń ázirlegen ekinshi vaktsınasy. Sonymen qatar ony ázirleýge bizdiń ınstıtýttyń barlyq ǵalymdary atsalysty. Al vaktsına kimderge egiledi degen suraqqa kelsek, Densaýlyq saqtaý mınıstrliginiń talaptary basshylyqqa alynady», - dedi ol.
Mamannyń málimdeýinshe, jalpy koronavırýs indetine qarsy vaktsınanyń daıyn bolý merzimi klınıkalyq synaqtardyń nátıjesinde anyqtalady.
«Vaktsınanyń baǵasy týraly aıtýǵa áli erterek. Jalpy búgingi kúni vaktsına ázirleý tehnologııasy men talaptary belgili. Qazirgi ýaqytta ár eldiń ǵalymdary óz múmkindikteri men bar noý-haýdy qoldanýda, sondyqtan belgili bir eldiń vaktsınasyna qatysty durys nemese burys dep aıtýǵa bolmaıdy», - deıdi ǵylym doktory.
