Koronavırýsqa qarsy egilgen adamdar aýrýǵa tózimdi bolady - dáriger

ALMATY. QazAqparat – Almaty qalalyq qoǵamdyq densaýlyq saqtaý basqarmasynyń ókili Gúljaınat Tilegen turǵyndardy koronavırýstyń jańa shtamdarynan qorǵaný úshin vaktsınatsııa men revaktsınatsııadan ótýge shaqyrdy, dep habarlaıdy QazAqparat tilshisi.

Onyń aıtýynsha, koronavırýsqa qarsy ekpe alǵan adamdar aýrýǵa anaǵurlym tózimdi bolady.

«Vaktsına alǵan adam ózin qaýip-qaterden qorǵaıdy jáne aýrýdy jeńil túrde qabyldaıdy. Zertteýler koronavırýs ınfektsııasynan qorǵanys vaktsınalardyń alǵashqy dozalaryn alǵannan keıin, ásirese ártúrli shtamdardyń basym bolýyna baılanysty ýaqyt óte kele tómendeı bastaıtynyn dáleldegen. Biz birneshe koronovırýs tolqynyn, jańa shtamdardy bastan ótkerdik. Kórip otyrǵanymyzdaı, vırýs árbir tolqynda álsirep, mýtatsııaǵa ushyraıdy. Ekpe alǵan adamdar anaǵurlym aýrýǵa tózimdi. Immýnıtettiń álsireýi ekpeden soń 6-12 aıdan keıin bastalady. Vaktsınadan keıingi ımmýndyq reaktsııany kúsheıtý úshin revaktsınatsııa qajet», - dep túsindirdi basqarma ókili.

Sonymen qatar, ol búgingi kúni qalada 88 vaktsınatsııa pýnkti jumys isteıtin atap ótti. Onda 315 adamnan turatyn 99 egý brıgadasy bar.

«Búgingi tańda preparattyń birinshi komponentimen 1 241 540, ekinshi komponentimen 1 207 511 qala turǵyny egildi. Pfizer (Comirnaty) vaktsınasymen 119 065 adam egildi, onyń ishinde 4 684 júkti áıel, 15 896 bala emizetin ana jáne 55 045 jasóspirim bar», - dedi Gúljaınat Tilegen.