Koronavırýsqa qarsy dári-dármektiń baǵasy qalaı retteledi
NUR-SULTAN. QazAqparat - Premer-Mınıstrdiń orynbasary Eraly Toǵjanov Májilis depýtatynyń dári-dármektiń shekti baǵasyn belgileý mehanızmi týraly saýalyna jaýap berdi, dep habarlaıdy QazAqparat tilshisi.
«Memleket basshysynyń dárilik zattarǵa baǵany tómendetý jónindegi tapsyrmasyn oryndaý úshin Densaýlyq saqtaý mınıstrligi Básekelestikti qorǵaý jáne damytý agenttiginiń maquldaýymen tegin medıtsınalyq kómektiń kepildik berilgen kólemi sheńberinde jáne mindetti áleýmettik medıtsınalyq saqtandyrý júıesinde dárilik zattarǵa, sondaı-aq medıtsınalyq buıymdarǵa qoıylatyn shekti baǵalar men ústeme baǵalardy retteý, qalyptastyrý qaǵıdalaryn bekitken. Sol qaǵıdada karantın, tótenshe jaǵdaı rejımi, áleýmettik medıtsınalyq saqtandyrý júıesiniń tótenshe jaǵdaılary kezinde shekteý sharalary qalaı iske asatyny kórsetilgen», - dep jazylǵan Eraly Toǵjanovtyń jaýabynda .
Úkimet basshysynyń orynbasary erekshe tártipti qoldaný kezinde shekti baǵa kóterme jáne bólshek saýda úshin marketıngtik shyǵyndardy eseptemeý (30% mólsherinde), sondaı-aq kóterme saýdada (20-dan 10% - ǵa deıin) jáne bólshek saýdada (55-ten 27,5% - ǵa deıin) ústeme baǵalaryn eki ese tómendetý jolymen qalyptasatynyn aıtady.
«2020 jylǵy 31 jeltoqsanda DSM koronavırýs ınfektsııasyn emdeý hattamasyna kiretin 370 preparattyń shekti baǵasyn bekitti. Osylaısha, koronavırýsqa qarsy barlyq preparatqa erekshe tártip qoldanylyp otyr. Sonyń nátıjesinde baǵanyń tómendeýi naryqtyq baǵalarmen salystyrǵanda 27%-dy qurady», - dedi vıtse-premer.
