Koronavırýsqa qarsy dári-dármektiń 48% Qazaqstanda óndiriledi

NUR-SULTAN. QazAqparat – Úkimet otyrysynda Densaýlyq saqtaý mınıstri Alekseı Tsoı halyqty dári-dármekpen qamtamasyz etý kórsetkishterin baıandady, dep habarlaıdy QazAqparat tilshisi.

«Eldiń farmatsevtıkalyq naryǵynda biryńǵaı dıstrıbıýtor arqyly dári-dármek satyp alý úlesi aqshalaı mánde 42,4% quraıdy. Al otandyq taýar óndirýshilerdiń (OTÓ) úlesi aqshalaı mánde 17% bolyp, zattaı mánde naryqtyń 39% qamtamasyz etti. Sońǵy jyldary otandyq taýar óndirýshiler eksportynyń 4,3 ese artqany baıqalady, onyń 57,2% Reseıge, 32% - Qyrǵyzstanǵa eksporttalady», - dedi mınıstr.

Sonymen birge, jergilikti dári-dármek óndirýshilerdi qoldaıtyn basty shara – olarmen 10 jylǵa deıingi uzaq merzimdi kelisimsharttar bekitý.

«2009-2020 jyldar kezeńinde biryńǵaı dıstrıbıýtordyń satyp alýy aıasynda dárilik zattar men medıtsınalyq buıymdardyń 5 042 ataýyn jetkizý úshin 88 uzaq merzimdi shart jasaldy. 10 jyl ishinde Otandyq taýar óndirýshiler taýary 312,4 mlrd teńgeden astam somaǵa satyp alyndy. Biryńǵaı dıstrıbıýtor satyp alatyn kólemniń 30% otandyq taýar óndirýshilerden alady. COVID-19 dári-dármeginiń 48% el ishinde óndiriledi», - dedi A. Tsoı.

Dárilik zattardy tirkeý kezindegi saraptama jedeldetildi. Dárilik zattar men medıtsınalyq buıymdardyń sapasy baǵalaý protsedýrasy 3 jumys kúninde júrgiziledi. TJ jaǵdaıynda syrttan keletin dárilik zattar men medıtsınalyq buıymdardy alý jeńildedi.