Koronavırýsqa qarsy alǵashqy vaktsınalar Norvegııada paıda bolýy múmkin
Osylaısha COVID-19 vırýsyna qarsy vaktsına Eýroodaq keńistiginde, sonymen qatar Eýropalyq erkin saýda qaýymdastyǵy elderinde (onyń ishinde Norvegııa da bar) maquldaýdan ótkennen keıin josparlaǵan merzimnen bir apta buryn qoldanysqa engizilýi yqtımal. NRK-nyń málimetine sáıkes, alǵashqy vaktsına 21 jeltoqsannan keıin Norvegııaǵa jetkizilýi yqtımal.
Rojdestvolyq merekeler kezinde qoldanysqa engizilýi múmkin vaktsınalardyń arasynda Pfizer/Biontech preparaty da bar. Ol vaktsınany amerıkalyq jáne germanııalyq kompanııa birlese jasaǵan. Atalmysh vaktsına Kári qurlyq aýmaǵynda maquldaýdan ótýi múmkin vaktsınalardyń aldyńǵy qatarynda tur.
Osy jaǵdaıǵa baılanysty pikir bildirgen Norvegııanyń densaýlyq saqtaý mınıstri Bent Hoıe joǵaryda atalǵan jospardy merzimniń optımıstik sıpatqa ıe ekenin aıtady.
«Álbette bul vaktsına Rojdestvoǵa deıin paıda bola qoımas. Áıtse de, biz oılaǵannan erterek jetkizilýi ábden yqtımal», - deıdi ol.
Norvegııadaǵy vaktsınatsııa týraly sóz qozǵaı kele Koroldiktiń densaýlyq saqtaý organdary bul protsess kelesi jyldyń sáýirinde bastalatynyn boljaǵan. Osy jyldyń 2 jeltoqsanynyń basynda táýelsiz analıtıkalyq ortalyqtyń júrgizgen zertteýine sáıkes, saýalnamaǵa qatysqan 8500 norvegııalyqtyń 60%-y koronavırýsqa qarsy ekpe saldyrýǵa nıet bildirgen. 12%-y vaktsınatsııaǵa qarsy ekenin aıtsa, árbir tórtinshi respondent jaýap berýge qınalǵan. Áıtse de qarasha aıynan bastap vaktsınatsııa alǵysy kelmeıtinderdiń úlesi 4%-ǵa tómendedi. Al vaktsınatsııany qoldaýshylardyń sany 3%-ǵa ósken.
Sonymen birge, Norvegııa farmatsevtıkalyq qaýymdastyǵy budan buryn aımaqtyq mýnıtsıpalıtetter koronavırýsqa qarsy vaktsınany tıisti jaǵdaıda saqtaýǵa daıyn ba degen suraqty qoǵam talqysyna salǵan bolatyn. Qaýymdastyq jetekshisi Ronnaýg Larsenniń aıtýynsha, vaktsınany saqtaý qajettigi erekshe jaǵdaıdy qajet etedi. Pfizer / BioNTech vaktsınasy 5 kún boıy -70 gradýsqa deıingi ortada saqtalýy kerek. Al Moderna kompanııasynyń vaktsınasy -20 gradýsqa deıingi ortada 7 kúnge deıin saqatady. Biraq mundaı jaǵdaıda vaktsınany saqtaıtyn oryn Norvegııada sonshalyqty kóp emes.
