Koronavırýsqa bólingen qarjyny flesh-mobqa emes, dári-dármekke jumsaý kerek edi - Aıgúl Soloveva
NUR-SULTAN. QazAqparat – Koronavırýspen kúreske bólingen kólemdi qarajat flesh-mobqa jumsalǵan. Bul týraly Respýblıkalyq arnaıy monıtorıng tobynyń jetekshisi Aıgúl Soloveva búgin onlaın-brıfıngide aıtty, dep habarlaıdy QazAqparat tilshisi.
«Keshe Prezıdent koronavırýs ınfektsııasymen kúresýge 191 mıllıard teńge bólingeni týraly aıtty. Oǵan deıin shamamen 400 mıllıon dollar bólingen bolatyn. Bizdiń saraptamalyq top bul qarjy qandaı sharaǵa bólingenin anyqtap jatyr. Mendegi aqparat boıynsha, 600 mıllıon teńge flesh-mob uıymdastyrǵan jarnamalyq kompanııaǵa bólingen. Dál qazirgi jaǵdaıǵa jetkizbes úshin bul qarjyǵa qajetti dári-dármek, medıtsınalyq quraldardy alýǵa bolar edi. Degenmen. osy 600 mıllıon teńgeniń 200 mıllıon teńgesi áli jumsalmaǵan eken. Biraq ol qarjy QR Densaýlyq mınıstrligi uıymdastyrǵan tenderge qatysyp, utyp alǵan kompanııaǵa aýdarylyp qoıdy», - deıdi ol.
Onyń aıtýynsha, qandaı dári joq, qaı dáriniń baǵasy qanshaǵa qymbattaǵany týraly habarlamalar azamattardan túsip jatyr.
«Prezıdenttiń úndeýinen onyń oryn alyp jatqan quqyq buzýshylyq jaǵdaılar týraly habardar bolyp otyrǵanyn bildik. Memleket basshysy quqyq qorǵaý organdaryna dári-dármektiń jasandy tapshylyǵyn jasap otyrǵandarmen jumys isteýge tapsyrma berdi. Respýblıkalyq arnaıy monıtorıng toby Prezıdent bul tapsyrmany bergenge deıin eki kún buryn jumysty bastap ketti. Oryn alyp jatqan jaǵdaılarǵa narazy bolý – bir bólek, al máseleni sheshýge úles qosý – bir bólek. Almaty, Nur-Sultan qalalarynda, Mańǵystaý, Shyǵys Qazaqstan oblystarynda monıtorıng júrgizip, dári-dármek baǵasyn 1,5-2 ese qymbattatqan faktilerdi anyqtadyq», - dedi Aıgúl Soloveva.
