Koronavırýsqa baılanysty jabylǵan álem mýzeıleriniń 13% qaıtadan ashylmaýy múmkin
NUR-SULTAN. QazAqparat – Keshe halyqaralyq mýzeı kúnine oraı UNESCO men Halyqaralyq mýzeıler keńesi (IKOM) taldaý júrgizip, murajaılardyń koronavırýs pandemııasynan qatty zardap shekkenin rastady, dep jazady Unesco.org.
Búgingi tańda murajaılardyń 90 paıyzy nemese 85 myńnan astam mýzeı jabylǵan. Onyń ústine Afrıka men araldaǵy damýshy elderde mýzeılerdiń 5 paıyzy ǵana óz aýdıtorııasyna onlaın kontent usyna alǵan. Búkil álemdegi mýzeılerdiń 13 paıyzy esigin qaıta ashpaýy múmkin.
Murajaı qyzmetkerleri qatysqan eki zertteý de koronavırýs pandemııasynyń mýzeı isine áserin baǵalaýdy maqsat etti. Olar bul salanyń álemdik qaýip-qaterge qalaı beıimdelgenin jáne ol aıaqtalǵannan keıin mýzeıdi qoldaý ádisteri qandaı bolatynyn anyqtaýǵa tyrysty.
«Murajaılar qoǵam ornyqtylyǵyn qamtamasyz etýde jetekshi ról atqarady, - deıdi UNESCO bas dırektory Odre Azýle. - Biz olardyń bul daǵdaryspen kúreste jeńip shyǵýyna jáne aýdıtorııamen baılanysyn úzbeýine kómektesýimiz kerek. Bul pandemııa adamzattyń jartysyna tsıfrlyq tehnologııalar qoljetimdi emestigin esimizge saldy. Biz eń álsiz jáne oqshaýda otyrǵan jandardyń mádenıetten qol úzbeýi úshin jumys isteýimiz kerek».
UNESCO mamyr aıynyń ortasynda ResiliArt qozǵalysy aıasynda mýzeılerge arnalǵan pikirtalasty bastaǵan edi. Alǵashqy úsh dıskýssııa ıber-amerıkalyq óńirdegi jaǵdaıdy jáne mýzeı men osy istiń mamandaryn qoldaý strategııasyn sóz etedi.
IKOM júrgizgen zertteý kórermeninen aıyrylǵan mýzeılerdiń tabysy azaıatynyn kórsetip berdi. Bul sondaı-aq mýzeımen baılanysty mamandyqtarǵa da áser etýi múmkin.
UNESCO men IKOM taıaýda atalmysh zertteýdiń nátıjesin jarııalaıdy.
