Koronavırýsqa baılanysty qandaı buqaralyq sharalarǵa shekteý qoıylady
«Koronavırýs ınfektsııasynyń qaýpine baılanysty tıisti shekteý sharalary kúshine enip jatyr. Eń birinshi kezekte merekelik is-sharalar bolmaıtyn boldy. Baspasóz máslıhattary men kóptegen saıys uıymdastyrylmaıdy», - dedi Eljan Birtanov OKQ-da ótken baspasóz máslıhatynda.
Mınıstrdiń aıtýyna qaraǵanda, keıbir sharalardyń ótpeıtini kúni buryn belgili bolǵan.
«Ásirese sporttyq jáne mádenı sharalar. Keleshekte taǵy bir memleket koronavırýs qaýpi jaǵynan birinshi sanatqa engizilýi múmkin. Sol sebepti aldyn ala eskertemiz. Sapardy keıinge qaldyryp, eshqaıda shyqpaǵan abzal. Aýrýǵa baılanysty jaǵdaı kún saıyn ózgeriske ushyraıtyndyqtan ahýalǵa kúndelikti jańadan baǵa beriledi», - dedi mınıstr.
Dese de Eljan Birtanov ortalyq deńgeıde qandaı da bir sharalardy shektep, qoǵamdyq oryndardy jabý týraly buıryqtyń shyqpaǵanyn aıtady.
«Ákimder nemese aımaqtardyń ózge de jaýapty adamdary qandaı da bir sharalardy qabyldap, jarııalaıtyndaı tıisti jospar barshylyq. Óńir-óńirge baılanysty epıdemıologııalyq ahýal da ártúrli. Máselen bir óńirde karantın engizýdiń qajettigi bolmasa, ekinshi óńirde halyqaralyq áýejaı bolǵandyqtan onda táýekelder barshylyq. Sebebi ol jerge kún saıyn adamdar kelip-ketip jatady», - dedi spıker.
Mınıstr óz sózin mysalmen shegeleı tústi.
«QHR-da kórgenimizdeı, Hýbeı provıntsııasynda ǵana karantın engizildi. Beıjińde belgili bir shekteýler boldy. Qalǵan qalalar kádimgi kúndelikti tirligin jalǵastyra berdi. Ońtústik Koreıa men Italııada da jaǵdaı sol. Bárine salmaqty qaraǵan abzal. Shyǵyn bolmastan jasqanýdyń reti joq. Karantınde jatqandardyń ishinde sportshylar da, bıznesmender de, muǵalimder de bar. Bárine ereje ortaq», - dedi mınıstr.