Koronavırýsqa baılanysty hokkeıden álemdik 6 chempıonat ótpeıtin boldy
NUR-SULTAN. QazAqparat – Halyqaralyq hokkeı federatsııasy (HHF) koronavırýstyń taralýyna baılanysty naýryz aıyndaǵy 6 halyqaralyq týrnırdiń ótpeıtinin málim etti, dep habarlaıdy QazAqparat HHF saıtyna silteme jasap.
Erler arasynda U-18 jasóspirimder álem chempıonatynyń ekinshi dıvızıondaǵy A tobynda (22-28 naýryzda Tallınde josparlanǵan) jáne V tobynda (23-29 naýryz Sofııada), sondaı-aq úshinshi dıvızıondaǵy A tobynda (16-22 naýryz Ystanbulda) jáne V tobynda (29 naýryzdan 4 sáýirge deıin Lıýksembýrgtiń Kokkelshoıerinde) oıyndar ótpeıtin boldy.
Áıelder arasynda álem chempıonatynyń birinshi dıvızıondaǵy V tobynda (28 naýryzdan 3 sáýirge deıin Polshanyń Katovıtsa qalasy) jáne ekinshi dıvızıondaǵy A tobynda (29 naýryzdan 3 sáýirge deıin Ispanııanyń Hake qalasyn) jarystar toqtatyldy.
Budan bólek, hokkeıden Qazaqstan áıelder quramasy Polshanyń Katovıtsa qalasyndaǵy álem chempıonatyna (29 naýryz – 3 sáýir) qatysýy tıis edi. Alaıda, Halyqaralyq hokkeı federatsııasynyń medıtsına komıteti senbi, 1 naýryz kúni Býdapeshte ótkizgen otyrys barysynda bul týrnırdi keıinge shegerý usynysyn jasady.
«Medıtsına komıtetine usynys jasaǵany úshin alǵys aıtqym keledi, sondaı-aq Keńes múshelerine osyndaı qıyn kezeńde usynysty qoldaǵany úshin yqylasymdy bildiremin. Biz kún saıyn elderdegi jaǵdaıdy baqylap otyramyz», - dedi HHF prezıdenti Rene Fazel.
Aıta keteıik, 2020 jyly Áıelder arasynda ótetin shaıbaly hokkeıden álem chempıonatynyń jáne 2020 jyldyń sáýir jáne mamyryna josparlanǵan basqa da chempıonattardyń kestesine ózgeris engizilgen joq.
Eske salaıyq, Qazaqstan Respýblıkasynyń Ulttyq Olımpıadalyq komıteti koronavırýsqa baılanysty otandyq sportshylar úshin ahýaldyq shtab qurǵan bolatyn.
