Koronavırýs júrek-qan tamyrlary aýrýlarynyń asqynýyna ákeledi – dáriger

ALMATY. QazAqparat- Kardıologııa jáne ishki aýrýlar ǵylymı-zertteý ınstıtýtynyń basqarma tóraǵasynyń orynbasary, medıtsına ǵylymdarynyń kandıdaty Qurmanǵazy Madalıev Dúnıejúzilik júrek kúnine arnalǵan brıfıngte koronavırýstyń júrek aýrýlaryn qalaı asqynatyny týraly aıtty, dep habarlaıdy QazAqparat tilshisi.

Dárgerdiń aıtýynsha, koronavırýs organızmde birqatar ózgerister týdyrady. Bul júrek-qantamyr júıesine de áser etedi. Qan uıýynyń buzylýy mıkrotrombtardyń paıda bolýyna, al tamyr qabyrǵasynyń qattylyǵynyń ózgerýi qan qysymynyń joǵarylaýyna ákeledi. Ásirese júrek pen qan tamyrlary aýrýlary bar adamdardyń densaýlyǵyna zııan tıgizedi.

«Koronavırýsty juqtyrǵan barlyq adamda júrek pen qan tamyrlary problemalary bolady dep aıtýǵa bolmaıdy. Táýekel tobyndaǵy adamdar birinshi orynda. Tájirıbe kórsetkendeı, ıshemııalyq aýrý, arterııalyq gıpertenzııa sııaqty sozylmaly aýrýlary bar, endokrındik júıeniń problemalary bar adamdar - qant dıabeti, artyq salmaq, qart adamdarda tromb túzilýiniń joǵarylaýy baıqalady. Júrektiń ıshemııalyq aýrýy, tamyrlardyń aterosklerotıkalyq zaqymdanýy bar emdelýshilerde koronarlyq tamyrlardyń mıkrotrombozyna baılanysty qaıtalanatyn ınfarkt bolýy múmkin. Sondyqtan sozylmaly aýrýlary bar naýqastarǵa asa saq bolý kerek», - deıdi kardıolog.

Sonymen qatar, ol júrekti nyǵaıtatyn eń jaqsy «vıtamın» belsendi demalys, durys tamaqtaný, uıqy men sergektik, turaqty dene belsendiligi: serýendeý, fızıoterapııalyq jattyǵýlar, júgirý ekenin atap ótti.