Koronavırýs júrek-qan tamyr aýrýlarynyń asqynýyna ákeledi – kardıolog

ALMATY. Qazaqparat – Almatydaǵy kardıologııa ortalyǵynda koronavırýs jáne júrek dertine shaldyqqan 2 myńǵa jýyq naýqas emdeldi. Bul týraly onlaın brıfıng barysynda ortalyq dırektory Almat Qodasbaev aıtty, dep habarlaıdy QazAqparat tilshisi.

Almat Qodasbaevtyń aıtýynsha, Almaty qalasynyń kardıologııalyq ortalyǵynda 260 tósek-oryn qaıta jasaqtaldy, mekeme eki aıdan beri ınfektsııalyq statsıonar retinde jumys istep jatyr. Onda júrek-qan tamyrlary aýrýlary men koronavırýsqa shaldyqqan naýqastar emdeledi.

«Bıyl Almaty kardıologııalyq ortalyǵy ekinshi ret birinshi eshelondy aýrýhanaǵa qaıta profıldendi. Infektsııalyq statsıonarlarǵa deıin mekeme osy jyldyń naýryz jáne sáýir aılarynda jumys jasady. Bul jumys 24 shildede ekinshi ret qaıta formattaldy. 500-ge jýyq dáriger men medbıke táýlik boıy kómek kórsetedi»,- deıdi ol.

Júrek ortalyǵy dırektorynyń sózinshe, júrek tini koronavırýs aýrýy kezinde sezimtal bolady.

«Aýrýǵa eń sezimtal – júrek-qan tamyrlary aýrýlary, qant dıabeti nemese semizdikpen aýyratyn adamdar. Olardyń aýrýy óte qıyn, mundaı naýqastar uzaq emdelýdi qajet etedi. Bıyl bizdiń kardıologııalyq ortalyqta 1 950 adam emdelip shyqty. Búgingi tańda tósek syıymdylyǵy 80%-dy quraıdy. Naýqastardy emdeýde biz qazirgi zamanǵy jabdyqty qoldanamyz, koronarlyq angıografııany júrgizemiz, ekstrakorporaldy membranalyq oksıgenatsııa (EKMO) apparatyn qoldanamyz. Barlyq dárigerler Nur-Sultan qalasynyń kardıohırýrgııalyq ortalyǵynda oqyp keldi», - dedi Almat Qodasbaev.

Kardıologııalyq ortalyqta koronarlyq angıografııanyń kómegimen júrek tamyrlary zertteledi.

«EKMO apparaty gaz almasý fýnktsııasyn oryndaıdy. Biz bul qurylǵyny alty naýqasty qutqarý úshin qoldandyq. Qazirgi ýaqytta qurylǵyǵa eki adam qosylǵan. Bir naýqas №2 perzenthananyń jansaqtaý bóliminde jatyr, bizdiń dárigerler onyń jaǵdaıyn sol jerde baqylaıdy», - dedi spıker.

Sonymen qatar, kardıologııalyq ortalyqtyń dárigerleri basqa ınfektsııalyq aýrýhanalarda aýyr naýqastarǵa keńes beredi. Qazirdiń ózinde 10 myńnan astam onlaın keńes berildi.

«Bul aýrý júreginde syrqaty bar jandardy qaıǵyly jaǵdaılarǵa ákelýi múmkin. Aýyr zardaptardyń aldyn alýdyń jalǵyz joly – koronavırýsqa qarsy vaktsınalaný. Vaktsına koronavırýs týdyratyn qan uıyǵyshtardyń aldyn alady. Covid-19 júrek-qan tamyr aýrýlarynyń asqynýyna ákeletini shyndyq. Júrektiń ıshemııalyq, tromboembolııalyq dertti asqyndyryp, júrekti álsizdendiredi. Naýqastardyń bul toby óz ómirin qutqarý úshin mindetti túrde vaktsına týraly oılanýy kerek», - dedi Almat Qodasbaev.