Koronavırýs juqtyrý jaǵdaıy: Varshavadan ushyp kelgen qazaqstandyq Germanııada bolǵan
NUR-SULTAN. QazAqparat – Nur-Sultan qalasynyń Qoǵamdyq densaýlyq saqtaý basqarmasynyń basshysy Sáýle Qısyqova koronavırýs juqtyrǵan Qazaqstan azamaty týraly aıtyp berdi. Ol Varshavadan ushyp kelgen bolatyn, dep habarlaıdy QazAqparat tilshisi.
«Varshavadan kelgen naýqasty biz ózge elderden kelgen azamattarǵa monıtorıng júrgizip jatqan kezde anyqtadyq. Ol epıdemıologııalyq turǵyda qaýipsiz sanalatyn Polshadan Varshava reısimen kelgenimen derekter jınaý protsesinde Germanııada bolǵanyn aıtty. Osy fakt boıynsha, sońǵy 14 kúnniń ishinde Germanııada bolsa, biz qosymsha tekserý kerek dep sheshtik. Ony biz 12 naýryz kúni jatqyzǵanbyz. Keshe test nátıjesine kúmánimiz boldy. Búgin qaıtalap laborotorııalyq zertteý júrgizgende ınfektsııa bar degen nátıje kórsetti», - dedi Sáýle Qısyqova OKQ-da ótken baspasóz máslıhatynda.
Onyń aıtýynsha, jalpy test nátıjesin naqtylaýǵa shamamen 5-6 saǵat ketedi.
Eske sala ketsek, búgin Qazaqstanda taǵy eki adamnan koronavırýs anyqtaldy. Onyń bireýi Varshava-Nur-Sultan ushaǵymen ushyp kelgen. Qazirgi ýaqytta koronavırýs juqtyrǵan qazaqstandyqtar sany 6-ǵa jetti.
