Koronavırýs juqtyrý oqıǵalary Aýstralııa men Japonııada tirkeldi
NUR-SULTAN. QazAqparat – Búgin kúndiz Aýstralııada koronavırýs aýrýy boıynsha úsh oqıǵa, Japonııada – bir oqıǵa tirkeldi. Bul týraly QazAqparat álemdik BAQ-qa siltememen habarlaıdy.
Guardian agenttiginiń habarlaýynsha, 2019-nCoV koronavırýsyn juqtyrý faktisi Qytaıdyń Výhan qalasynan Jańa Ońtústik Ýelske kelgen úsh adamda rastaldy. Úsheýi de 43, 45 jáne 53 jastaǵy er adamdar.
Buǵan deıin QazAqparat Aýstralııadaǵy alǵashqy naýqastyń Melbýrnnan tabylǵanyn habarlaǵan edi. 50 jastaǵy qytaılyq azamat jaqynda ǵana 2019-nCoV koronavırýsynyń oshaǵy Ýhan qalasynan kelgen.
Osylaısha, Aýstralııada koronavırýs juqtyrǵandardyń sany 4-ke jetti.
Sonymen birge, Japonııada koronavırýs juqtyrýdyń úshinshi oqıǵasy tirkelip otyr. Eldegi densaýlyq saqtaý mınıstrliginiń habarlaýynsha, úshinshi naýqas – jaqynda ǵana Ýhan qalasynda bolǵan qytaılyq týrıst áıel.
Japondyq BAQ-tyń habarlaýynsha, aldyńǵy eki oqıǵa sársenbi jáne juma kúnderi tirkelgen. Barlyq naýqastardyń Ýhan qalasynda bolǵany anyqtaldy.
Álem boıynsha, koronavırýs juqtyrǵandar sany 1300-den asty. Qytaıda 41 adam qaıtys boldy, olardyń 39-y Ýhan qalasy astana bolyp sanalatyn Hýbeı provıntsııasynyń turǵyndary bolǵan.
