Koronavırýs juqtyrǵanyńyz rastalsa ne isteý kerek – mamandar keńesi
NUR-SULTAN. QazAqparat – Koronavırýs ınfektsııasyn juqtyryp alǵanyńyz rastalsa ne isteý kerek? Mundaı jaǵdaıǵa Nur-Sultan qalasynyń qoǵamdyq densaýlyq saqtaý basqarmasy eń aldymen sabyr saqtap, tómende keltirilgen keńesterge qulaq asýǵa shaqyrady, dep habarlaıdy QazAqparat tilshisi.
Eń birinshi kezekte úıden shyqpaǵan abzal. Test qorytyndysy boıynsha koronavırýs juqtyrǵanyńyz rastalsa aýmaqtyq aýrýhanaǵa, ýchaskelik dárigerge qońyraý shalyp, test nátıjesi týraly habarlaý kerek.
Aýrýhana dárigeri test nátıjesine qaraı sımptomtardyń bolý-bolmaýyna baılanysty medıtsınalyq baqylaý nemese aýrýhanaǵa jatqyzý qajettigin aıqyndaıdy. Aýrý belgileri joq bolsa patsıent úıinde qalyp, dárigerdiń qashyqtan baqylaýynda bolady. Bul algorıtm qaladaǵy medıtsınalyq uıymdardyń resýrsyn tıimdi paıdalanyp, sizge ýaqtyly medıtsınalyq kómek berýge múmkindik beredi.
Elordada KVI-diń taralýyna jol bermeý úshin birqatar shara qabyldanyp jatyr. Keıingi aptada JRVI men pnevmanııa belgisimen júginetin adamdardyń kóbeıýine baılanysty qalanyń medıtsınalyq uıymdarynyń bazasynda 400 tósek oryny jasaqtalǵan. Ol oryndarda:
- keýde kletkalarynyń aǵzasy zerttelip, koronavırýs ınfektsııasy boıynsha analız alynady;
- aýyr dárejedegi JRVI nemese pnevmonııa anyqtalǵan jaǵdaıda naýqastar provızorlyq statsıonarǵa jatqyzylyp, sonda em alady.
- KVI rastalǵan jaǵdaıda olar ınfektsııalyq statsıonarǵa aýystyrylady;
- aýrýdy jeńil kóteretin jáne patologııa belgisi joq adamdar «úıdegi statsıonarǵa» aýystyrylady. Olardy aýmaqtyq aýrýhanalardaǵy dárigerler baqylap, emdeıdi;
Sonymen qatar qaladaǵy eki kópbeıindi statsıonarda ınfarkt, ınsýlt, qant dıabeti, hırýrgııalyq aýrýlarǵa jáne KVI kúdigine baılanysty 100 tósek oryn ázirlengen. Al ınfektsııalyq aýrýhanalarda aıaǵy aýyr áıelderge arnalǵan tósek oryndar daıarlanǵan.
