Koronavırýs juqtyrǵandarmen tyǵyz baılanysta bolǵandar qashyqtan jumys isteýi kerek
Nur-Sultan qalalyq sanıtarlyq-epıdemıologııalyq baqylaý departamentiniń basshysy Sarhat Beısenova qala ákimdigi ótkizgen onlaın brıfıngide qala aýmaǵynda osyndaı tártip bar ekenin eske saldy, dep habarlaıdy QazAqparat tilshisi.
«Maýsym aıynda KVI-men aýyrǵan naýqastardan alynǵan 30 oń synamaǵa molekýlıarlyq-genetıkalyq zertteý júrgizildi. Bizdiń bilýimizshe, kishigirim túrleri bar «omıkron» shtamy óte juqpaly jáne barlyq jastaǵy adamdar ınfektsııaǵa beıim ekenin kórip otyrmyz. Alaıda, 20-dan 30 jasqa deıingi adamdar kóbirek beıim. Ol sondaı-aq «delta» shtamyna qaraǵanda juqpaly. Klınıkalyq belgileri – sharshaý, bas aýrýy jáne dene qyzýynyń artýy», - dedi Sarhat Beısenova.
Onyń aıtýyna qaraǵanda, vaktsına alǵan adamdarda, sondaı-aq KVI-men aýyryp jazylǵan adamdarda ýaqyt óte deneniń ınfektsııadan qorǵaný deńgeıi tómendeıdi.
«Munyń saldarynan adam qaıtadan ınfektsııaǵa sezimtal bolady. Osyǵan baılanysty, vaktsınanyń bastapqy kýrsyn alǵannan keıin, ıaǵnı 6 aıdan soń KVI-ǵa qarsy revaktsınatsııa alý usynylady.
Eger PTR-testtiń qorytyndysy vırýs juqtyrǵanyńyzdy rastasa nemese naýqastarmen tyǵyz baılanysta bolsańyz, onda vedomstvoaralyq komıssııanyń sheshimine sáıkes qashyqtan jumys túrine aýysý kerek. Sol sebepti turǵyndardan osy erejege barynsha jaýapkershilikpen qaraýǵa jáne ózin-ózi soǵan tárbıeleýge shaqyramyn», - dedidepartament basshysy.
Onyń sózine qaraǵanda, Nur-Sultandaǵy epıdemıologııalyq ahýal «sary» aımaqqa jaqyndap keledi.
