Koronavırýs juqtyrǵanda úreıge salynýǵa bolmaıdy – dáriger
«COVID-19 – SARS-CoV-2 dep atalatyn jańa koronavırýs týdyratyn aýrý. Vırýstar syrtqy ortada turaqsyz keledi. Olar 56 gradýstan joǵary temperatýrada jáne hloroform, formalın, etıl spırti nemese efırdiń áserinen birden joıylady. Koronavırýs muzdatýǵa da tózimdi. Quramynda RNQ bar SARS-CoV-2 – óte erekshe vırýs. Ol túrli klınıkalyq belgilerdi týdyrady. Bul tumaý vırýsyna qaraǵanda anaǵurlym juqpaly. COVID-19 naýqastarynyń kópshiliginde jeńil nemese ortasha belgiler baıqalady, olar arnaıy em-domsyz jazylady. 65 jastan asqan adamdarda aýrý kúrdelirek ótedi, kóbinese pnevmonııaǵa ulasady. Tumaý vırýsy da pnevmonııa týdyrýy múmkin. Biraq tumaý vırýsy ókpe tininiń qabynýyna áser etedi, al koronavırýs – qan tamyrlary deńgeıinde áreket etedi, qannyń uıyǵyshtyǵyn buzady. Tumaý vırýsymen salystyrǵanda koronavırýs balalar men jastarda sırek, al egde jastaǵylarda jıi kezdesedi», - deıdi Vıacheslav Lokshın.
Dáriger koronavırýs ınfektsııasy rastalǵan jaǵdaıda úreılenbeý kerektigin atap ótti. Dúrbeleńnen ımmýnıtet álsireıdi. Onyń pikirinshe, qazir koronavırýs týraly aqparat kóbeıdi. Dárilik em-dom bastapqy pandemııaǵa qaraǵanda jeńilirek ótýde.
Vırýstyq ınfektsııa juqtyrǵanda Paratsetamol, Aspırın sııaqty qabynýǵa qarsy preparattardan basqa dári-dármek qabyldaýdyń qajeti joq. Onyń aıtýynsha, tumaý vırýsy men koronavırýsqa áser etetin naqty preparat joq. Qoldanystaǵy preparattardyń tıimdiligi dáleldengen joq.
«Eń bastysy – ystyq sýsyndar men qyzýdy basýǵa arnalǵan paratsetamol ishý qajet, tósek rejımi, aýany jeldetý, D dárýmeni, myrysh jáne mýltıvıtamınder keshenin qabyldaý kerek. Ókpe qabynyp, asqyný baıqalsa bakterııaǵa qarsy preparat taǵaıyndaý qajet bolýy múmkin. Alaıda mundaı dári-dármekti tek dáriger belgileıdi», - dedi ol.
Suhbat barysynda Vıacheslav Lokshın aýrý meńdegen jaǵdaıda qannyń uıý júıesi men baýyr qyzmetin tekserý kerektigin túsindirdi. Qant dıabetimen aýyratyn naýqastar da aýrýdyń qalaı órbıtinin baqylaýy kerek.
«Vırýs qan tamyrlaryna jáne qannyń uıýyna áser etedi, sondyqtan mıkrotromboz protsesi júretini jáne organdardyń, baýyrdyń, ókpeniń, búırektiń jáne tipti mıdyń qyzmeti buzylatyny dáleldendi. Sondyqtan terapııaǵa qan uıýǵa qarsy antıkoagýlıanttar qosylady», - dep qorytyndylady doktor.
Sonymen birge dáriger turǵyndarǵa tumaýǵa qarsy ekpe jasaýǵa keńes beredi. 65 jastan asqan adamdarǵa pnevmokokk vaktsınasyn jasaý usynylady.
«Karantın áli aıaqtalǵan joq. Sondyqtan, qoǵamdyq oryndarda maska taǵý, qashyqtyqty saqtaý, qol men bettiń gıgıenasyn este saqtaý qajet», - deıdi Vıacheslav Lokshın.
