Koronavırýs juqtyrǵan jolaýshy Beıjińge norvegııalyq olımpıadashylarmen birge ushqan

HELЬSINKI. QazAqparat - Norvegııalyq Olımpıada komıteti Oslonyń Gardermoen áýejaıynan Beıjińge ushqan sportshylarmen birge ushaq bortynda koronavırýs juqtyrǵan adamnyń bolǵanyn rastady. Bul týraly QazAqparat NRK habar taratý korporatsııasyna silteme jasap habarlaıdy.

«Jaǵdaı óte qıyn», - degen Koroldik Olımpıada komıtetiniń qysqy sport túrleri boıynsha menedjeri Helge Bartnestiń sózin keltiredi NRK.

Dúısenbi kúni keshke Norvegııa quramasynyń sportshylary bar birinshi bort Qytaıǵa ushyp ketti. Beıjińdegi Qysqy Olımpıada oıyndarynyń ashylý saltanaty 4 aqpanda ótip, oıyndar 20 aqpanda aıaqtalady. Kúrdeli epıdemııalyq jaǵdaıǵa baılanysty barlyq jarystar sanıtarlyq qaýipsizdik sharalaryn qatań saqtaı otyryp ótedi.