Koronavırýs juqtyrǵan jambyldyq otbasymen birge Qyrǵyz shekarasyn asyp kelgen
NUR-SULTAN. QazAqparat – Jambyl oblysynda koronavırýsqa qatysty sońǵy tirkelgen oqıǵanyń mán-jaıy belgili boldy, dep habarlaıdy QazAqparat coronavirus2020.kz silteme jasap.
26 naýryzda Jambyl oblysynda Qordaı aýdanynyń 1974 jylǵy turǵynynan koronavırýs ınfektsııasy tabyldy. Ol bir kún buryn otbasymen birge Qyrǵyzstannan kelgen.
Belgilengen algorıtmge sáıkes úılestirilgen is-qımyl nátıjesinde bes múshesi bar atalmysh otbasy shekaradan óte salysymen oqshaýlanyp, karantın statsıonaryna jatqyzylǵan.
Zerthana taldaýy bir adamda vırýs bar ekenin kórsetti, otbasynyń basqa músheleriniń taldaýy teris nátıje kórsetti.
Naýqas ınfektsııalyq statsıonarǵa aýystyryldy, qalǵandary karantın statsıonarynda medıtsınalyq baqylaýda qala beredi. Olarmen baılanysta bolǵan adamdar anyqtaldy, qazir qajetti epıdemııaǵa qarsy sharalar jasalyp jatyr.
