Koronavırýs juqtyrǵan sońǵy 4 adamnyń málimetteri jarııa etildi
NUR-SULTAN. QazAqparat – Elimizde koronavırýs ınfektsııasyn juqtyryp tirkelgen sońǵy 4 adamnyń málimetteri jarııa etildi, dep habarlaıdy QazAqparat coronavirus2020.kz silteme jasap.
24 naýryzda keshki saǵat 21:40-tan bastap elimizde koronavırýs juqtyrǵan 4 adam tirkeldi.
Shymkentte alǵashqy oqıǵa tirkeldi. 1996 jylǵy azamat ınfektsııalyq statsıonarda jatyr. Er adam Shymkentke Nur-Sultan qalasynan kelgen.
Qazirgi ýaqytta ol Shymkent qalasynyń juqpaly aýrýlar aýrýhanasyna oqshaýlanyp, em-dom qabyldap jatyr. Onyń jaǵdaıy birqalypty. Onymen baılanysta bolǵandardyń barlyǵy anyqtalǵan. Qazir olar oqshaýlanýǵa alynýda.
Koronavırýs ınfektsııasynyń aldyn alý úshin Shymkent qalasynyń jedel shtab músheleri barlyq sanıtarlyq-epıdemıologııalyq sharalardy júzege asyrýda. Sonymen qatar, shtab sheshimimen barlyq baǵynysty vedomstvo organdary qaladaǵy epıdemıologııalyq jaǵdaıdy aıryqsha baqylaýǵa aldy. Ekinshi jaǵdaı Nur-Sultan qalasynda tirkeldi. 1938 jylǵy er adam statsıonarda jatyr.
Úshinshi oqıǵa Jambyl oblysynda tirkeldi. Bul 1979 jylǵy azamat. Ol Qyrǵyzstannan kelgen. Statsıonarǵa jatqyzylǵan.
Koronavırýs ınfektsııasyna qatysty tórtinshi jaǵdaı Soltústik Qazaqstan oblysynda tirkelgen. Ol 1993 jylǵy azamatsha Reseı Federatsııasynan kelgen. Ol provızorlyq statsıonarda dárigerlerdiń baqylaýyna alyndy.
Onymen baılanysty bolǵandardyń barlyǵy anyqtaldy jáne statsıonarlyq karantınge oqshaýlandy.
Osylaısha elimizde jalpy 72 jaǵdaı tirkeldi. Nur-Sultan qalasy boıynsha 36 adam, Almaty qalasynda – 29 adam, Qaraǵandy qalasynda - 2, Almaty oblysynda - 1 adam, Aqtóbe oblysynda - 1 adam, Shymkent qalasynda – 1 adam, Jambyl oblysynda -1 adam, Soltústik Qazaqstan oblysynda - 1 adam.
