Koronavırýs juqtyrǵan Meırambek Besbaev qazaqstandyqtardy saq bolýǵa shaqyrdy

ALMATY. QazAqparat - Qazaqstannyń eńbek sińirgen qaıratkeri, «MýzART» tobynyń ánshisi Meırambek Besbaev óziniń densaýlyǵy týraly aıtty, dep habarlaıdy QazAqparat tilshisi.

«Eń áýeli emime shıpa berip, el qataryna qaıta qosqan Allaǵa sansyz shúkirlik. Meniń tileýimdi tilep otyrǵan ata-anama, otbasyma, baýyrlaryma, ónerdegi aǵa- ápkelerime, dostaryma myń alǵys. Es bilgeli beri elim alaqanyna salyp áldılep keledi. Qadirli aǵaıyn, sizderdiń tilekterińizge basymdy ıip rahmetimdi aıtamyn. Aq halatty abzal jandarǵa alǵysym sheksiz»,- dep jazdy ánshi Instagram-daǵy paraqshasynda.

Sondaı-aq, ol qazaqstandyqtardy saqtanýǵa jáne densaýlyqtaryn kútýge shaqyrdy.

«Aınalaıyn aǵaıyn, indettiń bary ras. Saqtanyńyzdar. Kútinińizder. Birinshi baılyq densaýlyq ekenin este ustaıyqshy. Qoryta kele, men úshin alańdaǵan barshańyzǵa rahmet. Men sizderdi jaqsy kóremin. Aýyrmańyzdar»,- dedi ol.

Buǵan deıin Meırambek Besbaevtyń koronavırýspen aýrýhanaǵa túskenin habarlaǵan bolatynbyz.