Koronavırýs juqtyrǵan qostanaılyq Mysyrdan kelgen
QOSTANAI. QazAqparat – Qostanaı oblysynda tirkelgen alǵashqy jaǵdaı týraly «Habar 24» arnasynda oblys ákiminiń orynbasary Marat Júndibaev aqparat berdi, dep habarlaıdy QazAqparat.
Oblys ákimi orynbasarynyń sózinshe, koronavırýs juqtyrǵan 1991 jyly týǵan azamatsha 23 naýryz kúni «Sharm-el-sheıh - Almaty» reısimen ushyp kelgen.
«Bastapqy tekserý kezinde odan jáne Qostanaı oblysynyń taǵy 4 azamatynan vırýs tabylǵan joq. Osylaısha olar Jambyl oblysyndaǵy Otar stansasynan poıyzǵa otyryp, Qostanaıǵa baǵyt alǵan. Almaty qalasy mamandarynan aqparat túsken soń, Qostanaı oblysynyń jaýapty organdary algorıtmge sáıkes shara qabyldady. Atalǵan tulǵalar jáne olarmen baılanysta bolǵan barlyq jolaýshylar men jolserik, barlyǵy 12 adam oqshaýlandy. Emhanadaǵy taldaý teris nátıje kórsetti. On ekinshi kúni qaıtadan alynǵan taldaý atalǵan azamatshada oń nátıje, qalǵan adamdarda teris nátıje kórsetti.Qazirgi ýaqytta tıisti epıdemııaǵa qarsy sharalar qabyldanyp jatyr», - dedi Marat Júndibaev.
Buǵan deıin Qostanaı oblysynda bir adamnyń koronavırýs juqtyrǵanyn habarlaǵan edik.
