Koronavırýs juqtyrǵan qazaqstandyqpen bir bortta bolǵan 14 azamat qaı óńirlerden tabyldy
NUR-SULTAN. QazAqparat – Nur-Sultan qalasynyń Qoǵamdyq densaýlyq saqtaý basqarmasynyń basshysy Sáýle Qısyqova koronavırýs juqtyrǵan qazaqstandyqpen bir bortta bolǵan 14 azamattyń qaı óńirlerge tarap ketkenin aıtyp berdi, dep habarlaıdy QazAqparat tilshisi.
«Olar saý azamattar. Olar koronavırýs juqtyrǵan adammen baılanysta bolǵandar. 14 azamatymyz óńirlerge tarap ketken. Olar barǵan jerinde anyqtalyp, statsıonarlarǵa oqshaýlandy. Olar Almaty, Atyraý, Stepnagorsk jáne Qaraǵandy qalalarynda», - dedi Sáýle Qısyqova OKQ-da ótken baspasóz máslıhatynda.
Aıta ketsek, buǵan deıin Mılannan Máskeý-Nur-Sultan áýe reısi arqyly ushyp kelgen qazaqstandyq áıelden koronavırýs ınfektsııasy anyqtalǵan edi. Al bortta 89 jolaýshy bolǵan. Onyń 14-i Qazaqstanǵa kelgennen keıin óńirlerge tarap ketken.
Sondaı-aq Densaýlyq saqtaý mınıstri 14 naýryzda elordada ótken baspasóz máslıhatynda Eljan Birtanov Qazaqstanda eki adamnyń koronavırýs juqtyrǵanyn jetkizgen edi. Kóp ótpeı Mılan qalasynan Nur-Sultanǵa kelgen taǵy bir qazaqstandyqtan koronavırýs ınfektsııasy tabyldy.
Keıin Germanııadan ushyp kelgen Qazaqstannyń taǵy bir azamatynan koronavırýs anyqtaldy. Osylaısha bul dertke shaldyqqandar sany 4 adamǵa jetken edi.
