Koronavırýs juqtyrǵan qazaqstandyq otyrǵan ushaqta qansha eldiń azamaty boldy

NUR-SULTAN. QazAqparat – Koronavırýs juqtyrǵan úshinshi adam kelgen ushaqta Qazaqstannyń 30-dan astam azamaty boldy. Bul týraly QR Densaýlyq saqtaý mınıstri Eljan Birtanov málim etti, dep habarlaıdy QazAqparat tilshisi.

«12 naýryzda Máskeýden kelgen reıstiń bortynda 90 jolaýshy boldy, onyń ishinde 37-si Qazaqstannyń, 42-si Reseıdiń, sondaı-aq qalǵan 11-i basqa elderdiń azamattary», - dep naqtylady mınıstr Ortalyq kommýnıkatsııalar qyzmetindegi baspasóz máslıhatynda.

Osy oraıda ol Mılannan kelgen naýqas áıel birden karantındik sharalarmen qamtylǵanyn atap ótti.

«Kelgen boıda áıeldiń Italııadan saparlaǵany anyqtaldy. Osy oraıda tıisti tártipke sáıkes, karantınge ornalastyryldy. Zertteý sharalarynyń aıasynda tıisti nátıjelerdi aldyq», - dedi Eljan Birtanov.

Budan buryn habarlanǵandaı, QR Densaýlyq saqtaý mınıstri Eljan Birtanov koronavırýs juqtyrǵan úshinshi adam Mılannan kelgenin aıtty.