Koronavırýs juqtyrǵan qazaqstandyq dárigerlerdiń jaǵdaıy qalaı
NUR-SULTAN. QazAqparat - QR Densaýlyq saqtaý mınıstrligi Qoǵamdyq densaýlyq saqtaý departamentiniń dırektory Maǵrıpa Embergenova koronavırýs juqtyrǵan dárigerlerdiń jaǵdaıyn aıtty, dep habarlaıdy QazAqparat tilshisi.
«Búginde Qazaqstanda 120 medıtsına qyzmetkeri ınfektsııany juqtyrýyna baılanysty em alyp jatyr. Olardyń da jaǵdaıyn ınfektsıonıstermen, pýlmonologtarmen jáne qarqyndy terapevtermen baqylanyp otyr. Jaǵdaılary qanaǵattanarlyq dep baǵalanady. Olar turaqty baqylaýymyzda tur», - dedi ol Ortalyq kommýnıkatsııalar qyzmetindegi onlaın-brıfıngte.
Osy rette Qazaqstanǵa kómek kórsetýge kelgen QHR ShUAR Halyqtyq aýrýhanasy bas dárigeriniń orynbasary Lý Chen óz elinde koronavırýs juqtyryp alǵan dárigerler jaıynda aıtyp berdi.
«Qytaıda 3 387 medıtsına qyzmetkeri aýyrdy. Olardyń 90 paıyzy - Ýhan qalasynyń turǵyndary, sol qalanyń medıtsına qymetkerleri. Bul qyzmetkerler indet ýshyǵyp turǵan sátte juqtyryp alǵan. Biz medıtsına qyzmetkerlerin oqytý, qorǵanys quraldarymen qamtamasyz etý arqyly kúrestik. Osyndaı sharalar qabyldanǵannan keıin dárigerler arasynda indet juqtyrý jaǵdaılary óte az boldy. Bul jaqsy nátıje berdi», - dedi Lý Chen.
