Koronavırýs juqtyrǵan elordalyq áıelmen birge ushqan 20 jolaýshy aýrýhanaǵa jatqyzyldy
NUR-SULTAN. QazAqparat – Koronavırýs ınfektsııasyn juqtyrǵan qazaqstandyq áıelmen bir ushaqta 90 jolaýshy bolǵan, onyń 20-sy aýrýhanaǵa jatqyzyldy, dep habarlaıdy QazAqparat tilshisi.
Bul týraly Nur-Sultan qalasy qoǵamdyq densaýlyq saqtaý basqarmasynyń basshysy Sáýle Qısyqova aıtyp berdi.
«Nur-Sultan qalasyna koronavırýs juqtyrǵan áıelmen bir ushaqta 90 jolaýshy ushyp keldi. 84 jolaýshy Nur-Sultan qalasynda júr. Olardyń arasynda issaparmen kelgen, qydyryp kelgen sheteldikter de bar. Qalǵan alty jolaýshy elimizdiń basqa óńirlerine shyǵyp ketken. Olarmen sol óńirler jumys isteýi tıis», - dedi S. Qısyqova Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, Nur-Sultandaǵy barlyq 84 jolaýshymen baılanys ornaǵan.
«Barlyq 84 jolaýshyǵa habarlasyp shyqtyq. Olardyń arasynda qaıtý bıleti bar reseılikter de bar. Soǵan qaramastan, barlyǵyn oqshaýlaımyz. Ázirge 20 adam aýrýhanaǵa jatqyzyldy», - dedi basqarma basshysy.
Buǵan deıin QR Densaýlyq saqtaý mınıstri Eljan Birtanov elordada koronavırýs juqtyrǵan úshinshi adamnyń anyqtalǵanyn habarlady.
Qazaqstandyq áıel 12 naýryz kúni Mılan-Máskeý-Nur-Sultan reısinen túsirilip, Nur-Sultan qalasyndaǵy kópbeıindi medıtsınalyq ortalyqtyń karantındik statsıonaryna jatqyzylǵan.
