Koronavırýs juqtyrǵan bir jasqa tolmaǵan eki balanyń biri aýyr halde
«Qazirgi ýaqytta elde koronavırýs ınfektsııasyn juqtyrǵandardyń ishinde bir jasqa tolmaǵan eki bala bar. Olar klınıkalyq hattamaǵa sáıkes qandaı preparattardy qandaı mólsherde berý kerektigi bekitilgen tártipke saı em alýda. Ol balalardyń biriniń jaǵdaıy qanaǵattanarlyq, vırýs juqtyrǵanymen aýrýdyń belgisi baıqalmaıdy. Ekinshi balanyń jaǵdaıy aýyr. Biraq ol bala týabitti patologııasyna baılanysty aýyr jaǵdaıda jatyr», - dedi Aıjan Esmaǵambetova OKQ-da onlaın rejımde ótken baspasóz máslıhatynda.
Memlekettik bas sanıtarlyq dárigeri Qytaıdan kelgen medıtsına mamandarynyń tájirıbesi týraly da sóz qozǵady.
«Qytaılyq mamandar koronavırýstyń aldyn alý boıynsha Qazaqstandaǵy sharalarmen tanysty. Álbette olardan alǵan tájirıbeni biz óz jumysymyzda paıdalanyp jatyrmyz. Jalpy medıtsınalyq qyzmetkerlerdiń arasynda qazirgi tańda 13 óńirde 423 koronavırýs ınfektsııasyn juqtyrý jaǵdaıy tirkeldi. Joǵary kórsetkish Almatyda (53 paıyz), Nur-Sultanda (33 paıyz), Shymkentte (24 paıyz) baıqalýda. Medıtsınalyq uıymdarda dárigerlerdiń jetispeýshiligin boldyrmaý maqsatynda ár óńirde dárigerlerdiń 10-20 paıyzdyq rezervi qarastyrylǵan. Sol sebepti búgingi tańda medıtsına qyzmetkerleri jetkilikti dep aıtýǵa bolady», - dedi ol.